Само што започнав, порача Трамп во обраќањето до Конгресот

Американскиот претседател Доналд Трамп го одржа своето инаугуративно обраќање пред двата дома на Конгресот во кое ги презентираше активностите на неговата администрација во првите 40 дена и најави дополнителни мерки, опишувајќи го првиот месец од неговиот мандат како најуспешен во американската историја. „Првиот месец од мојот мандат е најуспешен во историјата“, тврди Трамп, наведувајќи го Џорџ Вашингтон како втор најуспешен.

Тој рече дека неговата инаугурација пред шест недели „ја прогласи зората на златното доба на Америка“. Досега немаше „ништо освен брза акција“, рече Трамп, додавајќи дека неговата администрација досега направила повеќе од која било друга во четири цели години. „И јас само што започнав“, рече тој.

„До моите сограѓани, Америка се врати“, рече Трамп во својот говор, на громогласни овации и аплаузи од републиканците. Потпишани се над 1.000 одлуки, ова е време за големи соништа, изјави американскиот претседател.

Во текот на целото обраќање на Трамп, републиканците во Капитол стануваа со ракоплескање и одобрување, додека демократите држеа табли на кои пишуваше „Неточно“ и „Маск краде“.

Зборувајќи за брзите достигнувања на неговата администрација во првите 44 дена, Трамп го издвои проблемот со имигрантите, тврдејќи дека тие „одлучиле да не доаѓаат откако ги слушнале моите закани“. „Ја испратив американската војска и граничната патрола да ја одбијат инвазијата на границите на земјата“, рече тој, додавајќи дека „нелегалните преминувања минатиот месец беа убедливо најниските досега забележани“.

„Американскиот сон е незапирлив“

Трамп потсети дека го преименувал Мексиканскиот залив во Американски залив и го прогласил англискиот за официјален јазик на Соединетите држави.

Тој нагласи дека „американскиот сон е незапирлив“ пред да продолжи да се фали со својата победа на изборите на 5 ноември, кои ги нарече „мандат што не е виден со децении“ и изјави дека ги освоил сите седум „swing“ сојузни држави, нешто што републиканците не го направиле со децении. Трамп потсети дека потпишал одлука со која се признаваат само два пола, машки и женски и им се забранува на трансродовите спортисти да се натпреваруваат.

Претседателот на Претставничкиот дом, Мајк Џонсон, републиканец, наредил демократскиот претставник Ал Грин да биде отстранет од салата за време на отворањето на седницата, велејќи дека тој ја нарушил пристојноста стоејќи за време на говор и дофрлувајќи.

Американскиот претседател во својот говор се пофали со намалување на инфлацијата и пад на каматните стапки. Тој му се заблагодари на Илон Маск, кој исто така беше во салата, за кратењата што новоформираниот Оддел за владина ефикасност (DOGE) ги направи за да ги намали владините трошоци.

„Да ја направиме Америка повторно достапна“

„Да ја направиме Америка повторно достапна“, рече Трамп, ветувајќи дека ќе ја спаси американската економија. „Меѓу моите врвни приоритети е спасувањето на нашата економија и обезбедувањето олеснување“ на работничките семејства, рече Трамп.

Тој ја обвини претходната администрација, велејќи дека наследил „економска катастрофа и кошмар за инфлација“, додавајќи дека „секој ден се бори“ да ја сврти и „Америка да ја направи повторно прифатлива“. Тој го обвини неговиот претходник Џо Бајден за вртоглавото зголемување на цените на јајцата во последниве денови, велејќи дека тие се „надвор од контрола“ и дека напорно работи да ги урне.

Трамп укажа на големиот дефицит со Мексико и Канада, тврдејќи дека наметнувањето царини за овие две земји ќе го поттикне бумот на автомобилската индустрија во САД. Канада и Мексико „дозволија фентанил во нашата земја на нивоа што досега не биле видени“, рече Трамп. Белата куќа претходно соопшти дека високите царини што САД ги воведуваат на стоки од Канада и Мексико имаат за цел да ги притиснат да го запрат протокот на фентанил и мигранти во САД.

Американскиот претседател, исто така, вети намалување на даноците за сите и ги повика демократите да гласаат за овие предложени промени. Сè што е направено во првите 40 дена е доказ дека работиме на големото ослободување на Америка, тврди Трамп, истакнувајќи дека САД добиле 1,7 трилиони долари нови инвестиции „само во последните неколку недели“.

Тој се залагаше за враќање на безбедноста во американските градови и за безбедноста на американските полицајци. Тој, исто така, го повика Конгресот да донесе закони за зајакнување на границите и најави криминализирање на промената на полот.

Панамскиот канал, Гренланд, Блискиот Исток, Украина…

„Мојата администрација ќе го бара Панамскиот канал и веќе почнавме да работиме на тоа“, рече Трамп, мислејќи на прашањето за преземање на управувањето со Панамскиот канал, што тој претходно го најави. Според него, голема американска компанија денеска објави дека ги купува двете пристаништа во Панамскиот канал. Тој најави и стимулирање на бродоградежната индустрија.

„Вечерва имам и порака за неверојатниот народ на Гренланд: ние силно го поддржуваме вашето право да ја одредите сопствената иднина“, рече Трамп. „И ако одлучите, ние ви посакуваме добредојде во Соединетите Американски Држави“, рече тој, наведувајќи дека на САД им е потребен Гренланд „за национална безбедност и меѓународна безбедност“ и мисли дека „на овој или оној начин ќе го добиеме“.

Преминувајќи кон Блискиот Исток, Трамп рече дека работи на „враќање на нашите заложници од Газа“. Тој го пофали Авраамскиот договор како голем успех постигнат за време на неговиот прв мандат и најави дека „сега ќе се изградиме на овие основи“. Тој додаде дека луѓето „не зборуваат многу“ за Блискиот Исток, бидејќи се наметна прашањето за Украина и Русија.

Мала група демократи стана и излезе од салата кога Трамп зборуваше за Украина. Тврдејќи дека милиони Украинци биле убиени и дека САД испратиле милијарди долари помош, Трамп рече дека сака војната да престане. Тој ја критикуваше Европа, тврдејќи дека потрошила повеќе пари на руска нафта отколку на помош за Украина.

Трамп го наведе претседателот Володимир Зеленски и неговата вчерашна изјава. „Украина е подготвена да дојде на преговарачка маса, мојот тим е подготвен и ние навистина го цениме сето она што САД го направија за нас“, рече Зеленски по прекинот на разговорите во петокот. Украина е подготвена да потпише договор за ретки минерали, рече Трамп, тврдејќи дека е време да се запре убивањето и да се разговара со двете страни.

Трамп го заврши својот говор повикувајќи се на храброста и борбеноста на своите предци и, проследен со овации, вети американско знаме на Марс.