Само четири жени станаа градоначалнички – нема родова еднаквост на локално ниво
На овие избори имаше вупно 309 кандидати за градоначалници, од кои само 32 беа жени
Имено, на локалните избори 2025, четири жени успеаја да ја добијат довербата на граѓаните и да бидат избрани за градоначалнички во своите општини – една во првиот круг и три во вториот.
Во првиот круг, единствената избрана градоначалничка беше Бети Стаменкоска Трајкоска од ВМРО-ДПМНЕ, која ќе ја води општина Кисела Вода.
Во вториот круг, втор мандат освои Соња Стаменкова во Општина Македонска Каменица, поддржана од Коалицијата „Локални избори 2025 – СДСМ“.
Градоначалнички мандат во вториот круг освоија и кандидатките на Коалицијата „Твоја Македонија – ВМРО-ДПМНЕ“ Марија Нацева во Општина Неготино и Наталија Димитриева во Општина Демир Капија.
На овие избори имаше вупно 309 кандидати за градоначалници, од кои само 32 беа жени (10.35%).
Најмногу кандидатки – три – имаше во Прилеп, додека, по две се натпреваруваа во Битола, Велес, Карпош, Кисела Вода, Неготино и Центар.
Во 16 општини и Градот Скопје имаше само по една жена кандидат.
Во голем дел од општините жените воопшто не беа присутни на гласачките ливчиња.
На претходните локални избори во 2021 година имаше избрано само две градоначалнички на Скопје, Данела Арсовска и во Старо Нагоричане, Жаклина Јовановска.
Од првите локални избори досега статистиката во однос на родовата застапеност на жените е поразителна. Така од првите избори за градоначалник одржани во 1996 година до оние во 2021 година, за прв човек на општините биле избрани 642 мажи и 18 жени. Со последниве локални избори и четирите избрани градоначалнички, бројката на жени кои воделе општини ќе се зголеми на 22, а на мажи – градоначалници расте на 715.