САД ја продадоа првата венецуелска нафта, вредна 500 милиони долари

САД ја завршија својата прва продажба на венецуелска нафта, во вредност од 500 милиони долари (429 милиони евра), изјави денес функционер од администрацијата на американскиот претседател Доналд Трамп.

Деталите за продажбата сè уште не се откриени, иако функционерот рече дека се очекуваат повеќе продажби во наредните денови и недели, објави CBS News.

Белата куќа претстави стратегија за продажба на милиони барели санкционирана венецуелска нафта и контрола на приходите, потпирајќи се на инвестиции од американски нафтени компании за оживување на нафтената инфраструктура на земјата.

Приходите од продажбата на нафта ќе бидат поделени меѓу Венецуелците, американските компании и американската влада, по дискреционо право на федералната влада, соопшти претходно Белата куќа.

Трамп објави дека САД ќе продадат од 30 милиони до 50 милиони барели венецуелска нафта, во партнерство со американските компании.

Тој се состана со врвни американски нафтени директори во Белата куќа минатата недела за да разговараат за нивните потреби и загрижености, како и за потенцијалните инвестиции во Венецуела.

На состанокот, извршниот директор на „ЕксонМобил“, Дарен Вудс, му рече на Трамп дека средствата на неговата компанија биле запленети за време на двата претходни бранови национализации во Венецуела и дека повторното влегување на пазарот по трет пат „ќе бара некои прилично значајни промени“ од она што го видовме „историски“ во земјата, „и каква е моменталната состојба“.

Вудс ја нарече Венецуела „несоодветна за инвестиции“ сè додека не се направат промени во правниот систем и комерцијалната структура на земјата.