Руска уметничка објавила цртежи за драмата „Вагинални монолози“, обвинителот бара три години затвор за неа

Јавниот обвинител за време на рочиштето во Централниот окружен суд во рускиот град Комсомолск-на-Амур побара уметничката и ЛГБТ активистка Јулија Цветкова да се осуди на три години и два месеци затвор. Ова го соопшти нејзината мајка Ана Ходирева.

Цветкова е обвинета за дистрибуција на порнографија преку Интернет поради објавување цртежи на вулвата за познатата драма „Вагинални монолози“ на руската социјална мрежа ВКонтакте, кои таа ги администрирала. Уметничката рече дека води јавна страница со цел да го отстрани табуто од женската физиологија.

Против Цветкова беше отворена кривична постапка во ноември 2019 година. До март 2020 година беше во домашен притвор, а подоцна беше ослободена со кауција. Во јули 2020 година, таа беше обвинета. Неа ја бранеа шест адвокати.

Во последните години, Цветкова доби неколку административни казни за нејзините цртежи според членот за пропаганда на нетрадиционални сексуални односи меѓу малолетници.

На почетокот на јуни руското Министерство за правда ја прогласи Јулија Цветкова за „странски агент“.