„Русија остава смрт насекаде“: Во Изјум масовна гробница со 440 тела

Украинските власти пронајдоа 440 гробови на масовно гробно место во Изјум, град кој неодамна беше вратен од руските сили, објави украинското Министерство за одбрана на Твитер во петокот.

Претходно украинскиот претседател Володимир Зеленски рече дека на украинските и меѓународните новинари ќе им биде покажано местото за да видат што е откриено. „Сакаме светот да знае што навистина се случува и до што доведе руската окупација“, рече Зеленски.

Украинскиот центар за стратешки комуникации во четвртокот соопшти дека некои од гробниците откриени во Изјум биле „свежи“, а дека телата закопани таму биле „главно цивили“.

Изјум беше подложен на интензивни руски артилериски напади во април, а градот, кој се наоѓа во близина на границата меѓу регионите Харков и Донецк, стана важен центар за инвазиската војска за време на петмесечната окупација.

Украинските сили ја вратија контролата врз градот во саботата, задавајќи стратешки удар на рускиот воен напад на исток.

Фотографиите објавени од украинското Министерство за одбрана во петокот покажаа бројни крстови на могили во шумска област во близина на Изјум, како и поголема јама ископана во шумата.

Зеленски за време на неговото обраќање во четвртокот рече дека Русија мора да одговара за смртните случаи таму и во другите градови каде што биле пронајдени голем број тела.

„Буча, Мариупол и сега, за жал, Изјум… Русија остава смрт насекаде. И мора да биде одговорна за тоа. Светот мора да ја смета Русија вистински одговорн за оваа војна. Ќе сториме сѐ за ова“, додаде тој.

Серхи Болвинов, главен полициски истражител за регионот Харков, претходно изјави за британскиот Скај њуз дека можеби има други масовни погребни места во областа Харков.

Зборувајќи конкретно за 440-те гробници, Болвинов изјави за Скај њуз дека досегашните ексхумации покажале дека жртвите умреле од различни причини.

„Знаеме дека некои беа убиени (застрелани), некои загинале од артилериски оган, таканаречени трауми од експлозија на мини. Некои загинале од воздушни напади. Исто така, имаме информации дека многу тела сè уште не се идентификувани. Значи причините смртта ќе биде утврдена во текот на истрагата“, рече Болвинов.

Во меѓувреме, Олех Котенко, украинскиот комесар за исчезнати лица, во објава на Телеграм рече дека операциите за пребарување на останките на „паднатите херои“ се одвиваат внимателно низ целиот регион.

„Најголемиот проблем е што некои области сè уште се минирани. И покрај тоа, ние продолжуваме да работиме, бидејќи мораме да го вратиме секој херој дома за да можат семејствата на достоинствен начин да го почитуваат споменот на војниците кои загинаа за Украина“, рече Котенко.

Зеленски го посети Изјум во средата и им рече на новинарите дека е „шокиран“ од бројот на „уништени згради“ и „убиени луѓе“ што останаа во пресрет на руската окупација.

Москва го користеше Изјум како лансирна рампа за напади на југ во регионот на Донецк и во Купјанск, околу 50 километри северно од Изјум, и како железнички центар за повторно снабдување на своите сили.

Зеленски, исто така, им се заблагодари на странските влади што испратија истражители и обвинители да ги истражат наводните прекршувања на човековите права од страна на окупаторските сили во Украина, додавајќи дека сите окупирани области на крајот ќе се вратат.

Украинските сили се во постојана воена офанзива, особено во североисточните и јужните региони на земјата.

Зеленски во вторникот рече дека 8.000 квадратни километри територија сега биле ослободени од украинските сили до сега овој месец, при што приближно половина од областа сè уште се подложени на мерки за „стабилизација“. (Си-Ен-Ен)