Рубио: САД сакаат да ги „обноват“ односите со Колумбија

Американскиот државен секретар Марко Рубио денеска му вети на новиот десничарски претседател на Колумбија Абелардо де ла Есприеља, дека ќе ги обнови односите меѓу двата историски сојузници по „заладувањето“ на односите што настана за време на претходната левичарска влада на земјата.

Де ла Есприеља ја презеде функцијата во август од Густаво Петро, првиот левичарски претседател во историјата на Колумбија, со кого владата на Трамп одржуваше односи карактеризирани со тешкотии.

Говорејќи за „четири години многу лошо управување“, Марко Рубио вети дека ќе ги обнови врските и ќе почне „соработка без преседан“ со Богота за време на прес-конференцијата во Баранкиља, во северниот дел на Колумбија.

Тој зборуваше по средбата со Де ла Есприеља и потпишувањето договори за испорака на критични минерали и за соработка во областа на цивилната нуклеарна енергија.

Посетата е прва станица од дипломатската турнеја на Рубио низ Латинска Америка, чија цел е да ги зајакне врските со новите конзервативни лидери во регионот кои го поддржуваат Трамп.

Рубио ќе ги посети и Еквадор и Перу, каде што Вашингтон се стреми да ја продлабочи соработката во областа на безбедноста и да ја засили борбата против трговијата со дрога и организираниот криминал.

Американскиот државен секретар исто така ја пофали „енергијата“ и „храброста“ на новиот колумбиски претседател, кого го познава веќе неколку години.

Четириесет и осумгодишниот адвокат и богат бизнисмен Де ла Есприеља беше избран за шеф на државата во јуни, откако ја фокусираше својата кампања врз позиционирањето како антисистемски кандидат. Поддржувачот на Доналд Трамп вети дека ќе води бескомпромисна борба, со помош на САД, против криминалните групи во Колумбија, која е најголемиот производител на кокаин во светот.