Рекорди: Бугарија ќе гради автопат од 60 километри за 1,5 милијарди евра
Јавноста е во чудо од новиот тендер: Секој километар треба да чини 25 милиони евра
Бугарската Агенцијата за патна инфраструктура (АПИ) ја објави јавната набавка за последната делница од автопатот Русе – Велико Трново. Парите што треба да се потрошат се неверојатни, јавноста е во чудо.
Агенцијата проценува дека делот од 60 километри од Бјала до стариот бугарски главен град е речиси 3 милијарди лева без ДДВ. Тоа значи 1,5 милијарди евра.
Тоа се по 25 милиони евра по километар – нов бугарски рекорд за скапа градба, надминувајќи ги сите претходни.
„Бугарија со светски рекорд – автопат за 50 милиони лева по километар! Имаме пари, си се препуштаме. Сега сериозно – ова е дрско и лудо. Ако се прашувате каде одат 19 милијарди нови долгови – ова е за вакви работи“, напиша финансиерот и поранешен пратеник на ПП-ДБ, Владислав Панев на својот Фејсбук профил.
Изградбата ќе се финансира со пари од државниот буџет. Но, засега не се обезбедени средства, како што стои во документацијата за јавните набавки.
Јавната набавка за изградба на автопатот Бјала – Велико Трново е поделена на три посебни позиции.
Периодот на имплементација е речиси 5 години (1770 календарски денови).
Секој кандидат за учество во тендерската постапка може да поднесе понуди за повеќе од една од посебните позиции.
Автопатот Русе – Велико Трново е долг 133 километри. Трасата е поделена на три дела.