Првиот бугарски борбен авион Ф-16 Блок 70 слета во воздухопловната база Граф Игнатиево

Првиот бугарски повеќенаменски ловец Ф-16 Блок 70 на бугарското воздухопловство (БАФ) слета во воздухопловната база Граф Игнатиево.

Ова е веста, која денеска ја избра МИА од сервисот на Бугарската телеграфска агенција (БТА), согласно Договорот за размена на информации и професионална соработка, кој предвидува секој ден националните информативни агенции на Северна Македонија и Бугарија да разменуваат по една вест, која ќе ја објават на својот интернет сајт без промени со изрично посочување и цитирање на партнерот како извор.

На настанот беа присутни бугарскиот премиер Росен Жељазков, министерот за одбрана Атанас Запријанов и други функционери.

Министерот за одбрана на Бугарија Атанас Запријанов уште кон крајот на јануари изјави дека првите авиони ќе пристигнат во Бугарија на почетокот на април, а пред неколку дена рече дека тоа треба да се случи на 2 април. Самото пристигнување на авионот не го прави веднаш бугарски. Постои процедура која бара време. Неопходно е да се исполни и пренос со документи. Официјалната церемонија е планирана за 12 април, објасни министерот.

До крајот на годинава Бугарија ќе ги добие сите осум Ф-16 што американска компанија ги произведува за земјата според првиот договор потпишан од владите на Бугарија и САД во 2019 година, изјави министерот за одбрана по церемонијата за официјалното предавање на првиот бугарски Ф-16 Блок 70, што се одржа на 31 јануари во Гринвил, Јужна Каролина.

Според него, вториот договор, потпишан во 2022 година за набавка на уште осум авиони Ф-16 Блок 70, ќе биде реализиран до крајот на 2027 година.

– Ратификацијата на овој договор е завршена, подготовките за негова реализација се одвиваат според планот, нема сомнеж дека по успешното завршување на првиот договор годинава ќе почне имплементацијата на вториот договор за вторите осум авиони. Овие авиони ќе ги очекуваме по 2026-2027 година во Бугарија, изјави тогаш министерот.