Протест во Куманово, жителите бараат нова одоводна мрежа


Жителите од улицата „Киро Фетак“ во Куманово денеска протестираа пред Општината и побараа да се реши проблемот со водоснабдување, да се замени старата дотраена водоводна цевка, бидејќи речиси три недели се без вода.
Со транспаренти во рацете, тие побараа средба со кумановскиот градоначалник и брзо решение за нивниот проблем од надлежното претпријатие „Водовод“. Жителите од оваа улица велат дека немаат вода за основни потреби, ниту за пиење, дека им се расипуваат машините за перење поради притисокот, а имаат деца, болни и немоќни лица во семејствата. За технички потреби се снаоѓаат со вода од бушотини и бунари, од соседите од околните улици.
– Рекоа дека од понеделник ќе ја сменат цевката на целата улица, но сменија само дел. Откако ќе завршат еден дел, на друго место избива дефект, бидејќи мрежата е стара скоро 50 години, рече Наџмедин Јашари од Киро Фетак.

Неговиот сосед Шани Алити вели дека и кога доаѓа водата таа е нечиста и стравуваат од ширење заразни болести.

Тие обвинуваат дека нема безбедност при вршење на работите и побараа не само обнова на водоводната мрежа, туку и на канализациската мрежа, а и доведување гасовод. Велат дека доставиле барања до надлежните, но дека проблемот се одолговлекува, иако, надлежните се запознаени.

Жителите ги прими секретарот на општина Куманово, Десанка Стошевска и директорот на „Водовод“, Горан Стојковски, но жителите побараа директна средба со куманоскиот градоначалник Максим Димитриевски, кој е службено отсутен, по што си заминаа од Општината.

Директорот на претпријатието Стојковски вели дека има подготвено проектна документација и оти улицата „Киро Фетак“, влегува во трите приоритетни улици за промена на мрежата. На седница на Совет која треба да се одржи на 15 ноември, треба да влезе во програмата на општината.

До овој момент сменети се 120 метри на улицата каде приближно има 70-тина приклучоци. Запазени се процедурите, се водело сметка останатите улици да не останат без вода, а комплетната замена ќе треба да се направи по поминувањето на процедурите, изгласувањето во Советот, што се очекува во средината на ноември.

-Направен е основен проект, елаборат, линиски проект и на 15 ноември се подготвува програмата за работа за општина и ќе влезе во програмата. Дефектите се решавани секојдневно, во ниту еден момент немало 48 часа да бидат без вода или подолг период. Се работи за улица изградена во 1968 година, азбестно-цементна која е дотраена и конечно влезе во проектна документација и работа за општина Куманово, на 15 ноември ќе бидат ставени во програма за работа, ќе се распише тендер и водоводната мрежа ќе биде заменета, изјави Стојчевски.

Тој ги замоли жителите редовно да ги подмируваат обврските кон „Водовод“ кои во моментов, изнесуваат над 2,8 милиони денари.

Целосната санација која вклучува и поставување асфалт, може да се заврши до крајот на годината, но поради неработењето на асфалтните бази може да се пролонигра.

Овој проблем го актуелизираше советникот Осама Муадини од Алијанса за Албанците, кој бараше овој проблем да се надмине.