Приведени и повредени во Бугарија на протестите против ковид мерките

Во период кога Бугарија забележа рекорден број на новозаразени со ковид-19 од почетокот на пандемијата, пред бугарското Собранието се одржуваат протести против воведувањето на ковид-сертификатите.

Протестите кои ги организира партијата „Преродба“ ескалираа и има неколку повредени, но и приведени демонстранти. Како што јавуваат бугарските медиуми, неколку жени биле извлечени од толпата бидејќи им се слошило, а бил уапсен маж кој со себе носел гасен пиштол.

Полицискиот кордон поставен пред зградата на парламентот беше пробиен, а демонстрантите упатиле кон влезот скандирајќи „Оставка“. Тие стигнале до портата на Народното собрание во кое, иако седницата завршила, сè уште се наоѓаат дел од пратениците. Тропајќи по прозорите и вратите тие се обиделе да влезат во собраниската зградата, додека од друга страна полицијата се обидува да ја задржи толпата надвор.

Иако организаторите, наведуваат бугарските медиуми, повикуваат да се смират тензиите, тоа не се случило. Меѓу повредените, покрај демонстранти има и полицајци.