Пристигнаа 4.000 вакцини против сезонски грип

Во Центарот за јавно здравје пристигнале 4.000 вакцини против сезонски грип, но за да почнат да им се даваат на заинтересираните граѓани, се чека на одобрување од Министерството за здравство. 

Експерти очекуваат шпицот според бројот на заразени од сезонски грип да се случи во декември или почетокот на јануари. За да се крене имунитетот и да се развијат антитела кај лицата што ќе решат да се вакцинираат, потребни се од 15 до 20 дена, затоа крајно време е имунизацијата и со овој тип вакцина да почне што поскоро.

Вакцините против сезонски грип што Министерството за здравство ги нарача уште не се пристигнати во земјава.

„Министерството за здравство на почетокот од октомври ја заврши постапката и потпиша договор за набавка на 40.000 дози на четиривалентни вакцини. Испораката на вакцини за сезонски грип зависи од производителите. Министерството за здравство прави напори за што побрза испорака на вакцините“, велат од Министерството.

Не се знае кога ќе почне вакцинацијата, а уште не е договорена ни цената. Лани за овие вакцини се плаќаше 800 денари.

Вакцина против грип бесплатно може да примат старите лица над 65-годишна возраст, лицата со хронични заболувања, здравствените работници, бремените жени и децата на возраст од 6 месеци до 5 години, со претходно закажување преку системот „Мој термин“.

Здравствените власти се согласни дека граѓаните не треба да стравуваат од несакани последици доколку се комбинира вакцината против сезонски грип со вакцината против Ковид-19.