Принцот Хари и Меган ќе ја посетат Британија следниот месец

Англија – Принцот Хари и неговата сопруга Меган ќе ги посетат Велика Британија и Германија во првата недела од септември како дел од нивната работа со добротворни организации, изјави во понеделникот портпаролот на двојката.

Двојката му се придружи на кралското семејство на службата за благодарност во Лондон во јуни, како дел од прославата на платинестиот јубилеј на кралицата Елизабета, што е нивно прво јавно појавување во Британија откако се откажаа од кралските должности пред две години.

Хари и Меган, војводата и војвотката од Сасекс, ќе присуствуваат на самитот за млади лидери во Манчестер на 5 септември и на церемонијата на доделување награди за тешко болни деца на 8 септември.

Тие, исто така, ќе присуствуваат на настан во Германија на 6 септември по повод одбележувањето на една година до Игрите Invictus за повредени ветерани во 2023 година, кои треба да се одржат во Дизелдорф.

Хари, внук на кралицата Елизабета, се пресели во Соединетите Држави со Меган во 2020 година за да води понезависен живот. Тие живеат во Калифорнија со нивните две мали деца. (Ројтерс)