Полска ќе ја гради првата мала нуклеарна централа во Европа BWRX-300

Првата мала модуларна нуклеарна централа во Полска, или SMR, ќе биде изградена во Влоцлавек, објави енергетската компанија Орлен. Тоа е прв проект од ваков вид во Европа.

Полска ќе го изгради првиот мал модуларен нуклеарен реактор (SMR) во Европа BWRX-300, што претставува голем чекор во транзицијата на земјата од јаглен кон почиста енергија, објави енергетскиот гигант Орлен.

„Првата мала нуклеарна централа BWRX-300 во Европа ќе биде изградена во Полска. Ние ја градиме енергијата на утрешнината“, рече извршниот директор на Орлен, Иренеуш Фафара.

Одлуката е донесена по договор меѓу Орлен и Синтос Грин Енерџи. „Орлен“, најголемата полска енергетска компанија, планира да има во функција најмалку две SMR електрани со вкупен капацитет од 0,6 GW до 2035 година.

Според договорот, двете компании ќе основаат заедничко вложување наречено „Орлен Синтос Грин Енерџи“ (OSGE), при што секоја ќе има 50 проценти удел. Клучна одредба од договорот ѝ дава на OSGE целосен пристап до технологијата BWRX-300, која е развиена во САД.

„Ова ќе ѝ овозможи на компанијата да продолжи со процесот што ќе кулминира со изградбата на првата нуклеарна централа SMR во Полска на локација од клучно значење за Орлен, во Влоцлавек“, се вели во соопштението.

Како што е познато, во 2023 година, Полска одобри изградба на 24 SMR електрани на вкупно шест локации. Претстојната електрана во Влоцлавек претставува уште еден клучен чекор во пошироката стратегија на земјата за оддалечување од фосилните горива, особено јагленот.

Според извештајот на тинк-тенкот Форум Енерги, во 2019 година, Полска согорувала околу 87 проценти од вкупниот јаглен потрошен од домаќинствата во Европската Унија.

Орлен го опиша BWRX-300 како технолошки најнапреден проект за SMR во светот.

„Пристапот до овие решенија го става OSGE, а со тоа и Орлен, меѓу пионерите во употребата на оваа технологија“, нагласи Орлен.