Почна реконструкцијата на улица „Бутелска“

Денеска почна реконструкцијата на улицата „Бутелска“, што треба да ја направи побезбедна за сообраќај, но и за пешаците.

– Улицата „Бутелска“ е најпрометната улица во општина Бутел и е во исклучително лоша состојба. Нејзината обнова е значајна за повеќе од 25.000 граѓани кои транзитираат низ општината, како и за поврзување на населените места. Со овој проект се реконструира улицата „Бутелска“ на потегот од крстосницата со улицата „Александар Урдаревски“ до надпатникот на државниот пат А2 пред населбата Радишани. Во текот на градежните работи на улицата „Бутелска“ се нанесува нов асфалт на површина од 7.687 квадратни метри. Обновата на коловозот на улицата „Бутелска“ пред се ќе ја зголеми безбедноста за сите учесници во сообраќајот, а ќе овозможи и подобар проток на возилата – рече Арсовска.

За реконструкција на улицата „Бутелска“ Градот Скопје ќе вложи околу 14,5 милиони денари со ДДВ, при што за реализација на овој проект.

– На подрачјето на оваа општина Градот Скопје подготвува и други, нови инвестиции, а сакам да најавам дека во наредниот период ќе ги започнеме и постапките за реконструкција на улицата „Радишанска“ – најави градоначалничката Арсовска.

Градоначалникот на Општина Бутел, пак, денеска ја нагласи добрата соработка со Градот Скопје во реализацијата на значајни проекти за граѓаните.

– Со реконструкцијата на овој дел од улицата „Бутелска“ решаваме едно барање на граѓаните од овој дел од општината и го олеснуваме функционирањето и движењето на жителите, но и на сите оние што се упатуваат кон надпатникот на државниот пат А2 пред населбата Радишани. Безбедноста на граѓаните за нас е од исклучително значење, па во таа насока продолжуваме да работиме на нови проекти – рече Костовски.