Почина командантот на Аполо 8
Американскиот астронаут Френк Борман, кој беше командант на мисијата Аполо 8, почина на 95-годишна возраст, соопшти американската вселенска агенција НАСА. Борман почина во вторникот во Билингс, Монтана, САД, објави НАСА.
„Денес се сеќаваме на еден од најголемите луѓе на НАСА. Астронаутот Френк Борман беше вистински американски херој“, изјави администраторот на НАСА Бил Нелсон. Како командант на Аполо 8, Борман ја водеше првата мисија со екипаж околу Месечината во 1968 година и го отвори патот за слетување на Месечината неколку месеци подоцна.
Роден во американската сојузна држава Индијана, Борман разви страст за авиони на 15-годишна возраст, што на крајот го доведе во воздухопловните сили, а подоцна и во НАСА. Од 1950 година наваму бил борбен пилот, а подоцна и доцент по термодинамика на Воената академија Вест Поинт во државата Њујорк.
"Exploration is really the essence of the human spirit."#RestInPeace Frank Borman, who explored the frontiers of space as one of the first three @NASA astronauts to orbit the Moon almost 55 years ago on Apollo 8.
We have lost a legend. https://t.co/ELnxOSRG15 pic.twitter.com/Yyhg7p59vM
— NASA History Office (@NASAhistory) November 9, 2023
Добитник на бројни награди
Во 1967 година, тој беше член на истражниот одбор кој го истражуваше пожарот во вселенското летало Аполо во кој загинаа тројца астронаути. Подоцна беше именуван за шеф на програмата Аполо и го предводеше тимот што го редизајнираше вселенското летало Аполо.
По пензионирањето од воздухопловните сили во 1970 година, Борман станал консултант на Eastern Airlines пред да има различни високи позиции таму, вклучително и да стане нејзин претседател. Борман служеше и како специјален претседателски амбасадор на патувања низ Далечниот Исток и Европа.
Борман има добиено бројни награди, вклучувајќи го и Конгресниот вселенски медал на честа. Во 1990 година, Борман беше примен во Меѓународната вселенска куќа на славните, а во 1993 година во Куќата на славните на американските астронаути. Борман беше оженет и имаше два сина и четири внуци.