Пендаровски: Берлинскиот процес не е замена за членство во ЕУ 

Повторното актуелизирање на Берлинскиот процес со нова програма за работа е одлична вест. Потпишаните три договори за минување на границите меѓу нашите држави со лични карти, за признавање на високообразовните и на професионалните квалификации на докторите по медицина и стоматологија, како и на архитектите, се голем чекор напред кон создавањето на заеднички регионален пазар, рече претседателот Стево Пендаровски на конференцијата „Берлински процес 2022 – Интензивирана соработка: Обновениот Берлински процес и иднината на регионалната соработка во Југоисточна Европа“, во организација на Фондацијата „Фридрих Еберт“, во соработка со германската амбасада.

Има повече стратешки и структурни предности на Берлинскиот процес во однос на другите форми на регионална соработка, рече Пендаровски. „Прво, во Берлинскиот процес учествуваат сите шест држави од западен Балкан со што се постигнува вистинска инклузија и се избегнува можноста некој да биде маргинализиран или изолиран од процесот. Второ, Берлинскиот процес е заедничка иницијатива на државите членки на Европската унија и државите од западниот Балкан што е многу значајно во поглед на одговорноста за неговото функционирање, бидејќи врз неговата активност постои мониторинг од аспект на примената на европските стандарди и правила. И конечно, но најважно, Берлинскиот процес не е замена за полноправно членство во Европската унија, туку, инструмент за побрзо приклучување на сите шест држави од Западниот Балкан во ЕУ“.