Париз им рече „au revoir“ на автомобилите, уште 500 улици стануваат пешачки зони

Во текот на изминатите 20 години, Париз претрпе значителна трансформација, заменувајќи ги автомобилските патишта со велосипедски патеки, додавајќи зелени површини, а отстранети се 50.000 места за паркирање. Дел од таа придобивка беше невидлива – содржана во самиот воздух.

„Ерпариф“, независна организација која го следи квалитетот на воздухот во парискиот регион, оваа недела објави дека нивото на ситни честички (PM 2,5) е намалено за 55 отсто од 2005 година, додека нивото на азот диоксид е намалено за 50 отсто. Тие го препишаа ова подобрување на регулативите и јавните политики, вклучително и мерките за ограничување на сообраќајот и забраната на возилата кои најмногу загадуваат, пишува Вашингтон пост.

Загадени зони околу најфреквентните улици и автопатишта
Топлинските карти за загадувањето на воздухот покажуваат дека пред 20 години, речиси сите делови на градот биле означени со пулсирачко црвено – речиси секоја населба ја надминала границата на Европската унија за азот диоксид, кој се произведува со согорување на фосилни горива. До 2023 година, црвената зона се намали на само тенка мрежа на линии што минуваат низ и околу градот, што ги претставува најпрометните патишта и автопати.

Оваа промена покажува колку амбициозните политички мерки можат директно да го подобрат здравјето на жителите на големите градови. Здравствените експерти често го опишуваат загадувањето на воздухот како „тивок убиец“. И ПМ 2,5 и азот диоксид се поврзани со сериозни здравствени проблеми, вклучувајќи срцев удар, рак на белите дробови, бронхитис и астма.

Од 2014 година, Париз е управуван од градоначалничката Ен Идалго, социјалистка која е одговорна за бројни зелени политики. Таа често ја нагласува својата желба за „Париз кој дише, Париз во кој е попријатно да се живее“. Нејзините предлози наидоа на отпор кај десничарските политичари, здруженијата на сопственици на автомобили и приградското население, кое тврди дека ограничувањето на автомобилите им го отежнува секојдневниот живот.

Возачите на теренци плаќаат три пати повеќе за паркирање
Но, во март, Парижаните гласаа на референдум за претворање на дополнителни 500 улици во пешачки зони. Една година претходно, Париз значително ги зголеми цените за паркирање на теренците, принудувајќи ги нивните возачи да плаќаат три пати повеќе од возачите на помали автомобили.

Градот, исто така, претвори еден брег на реката Сена, претходно фреквентен пат, во пешачка зона и го забрани најголемиот дел од автомобилскиот сообраќај на шопинг авенијата Rue de Rivoli. Карлос Морено, професор на Универзитетот Сорбона во Париз и поранешен градски советник, изјави дека Париз развил „урбана политика заснована на благосостојба“.