Остра реакција на Грковска по укинувањето на пресудата за „Таргет-Тврдина“
Грковска го повика Апелацискиот суд суд „во името на правдата и во името на одговорноста пред граѓаните да ги соопштат причините за оваа одлука“
Многу брзо по објавувањето на соопштението на Апелацискиот суд во Скопје дека ја укинал пресудата од 65 години за обвинитете во клучниот случај со прислушувањето „Таргет-Тврдина“, вицепремиеркат за добро владеење, Славица Грковска се јави со остра реакција велејќи дека е загрижена од ваквата пресуда. Таа го повика Апелацискиот суд „во името на правдата и во името на одговорноста пред граѓаните да ги соопштат причините за оваа одлука“.
Еве што напиша Грковска на својот Фејсбук профил:
„Со голема доза на загриженост ја примив информацијата дека Апелациониот суд ја укинал првостепената пресуда за предметот ‘Таргет-Тврдина’, во кој, преку злоупотреба на службена положба, масовно беа прислушувани илјадници наши граѓани.
Уште позагрижувачки се информациите дека поради неажурното одлучување на судиите можно е застарување на делото кое значи повреда на основните уставно загарантирани човекови права.
Апелацискиот суд има обврска пред граѓаните, транспарентно и детално да ја образложи оваа одлука, за која има сомнеж дека не оди во правец на владеење на правото и еднаквост пред законот.
Во повеќе наврати кажав и сакам да повторам дека независноста на правосудниот систем не значи немање никаква одговорност.
Го повикувам Апелацискиот суд суд во името на правдата и во името на одговорноста пред граѓаните да ги соопштат причините за оваа одлука“.
Апелацискиот суд во соопштението за укинувањето на пресудата констатирал дека „првостепениот суд при постапувањето по овој предмет сторил суштествени повреди на одредбите од Законот за кривичната постапка кои се од апсолутен карактер, а на кои овој суд внимава по службена должност, со што се доведе во прашање фактичката состојба и правилната примена на Кривичниот законик“. Но во соопштението не стои какви повреди се напаравени од „апсолутен карактер“ на одредбите од Кривичниот законик.
Во овој процес на поранешниот директор на УБК Сашо Мијалков Судот му изрече казна затвор од 12 години за кривично дело „злосторничко здружување“, „злоупотреба на службената положба и овластување“ и „примање награда за противзаконито влијание“.
Судот на поранешниот началник на Петтата управа во МВР Горан Грујевски и вработениот во УБК Никола Бошкоски, кои се во бегство во Грција, во отсуство им изрече казна затвор од по 15 години.
Меѓу другите, беше осудена и поранешната министерка за внатрешни работи Гордана Јанкулоска доби четири години казна затвор за кривично дело „злоупотреба на службената положба и овластување“.