Османи гледа етничка дискриминација кога го обвинуваат за партизација

Тоа што за сите е партизација, за министерот за надворешни работи Бујар Османи е – етничка дискриминација.

-Многу сум осетлив кога  гледам елементи на етничка дискриминација. Како се ближат изборите, тоа добива вознемирувачки димензии. Затоа што во изминативе две недели, јас предложив и Владата одобри четворица конзули, од кои што двајца не беа Албанци и не се дел од МНР. Тие не беа спомнати, туку само Албанци. Тоа ме вади од кожа. Поттикнуваме синдикатски активизам, но не да се демонизира интеграцијата на Албанците, рече министерот за надворешни работи, Бујар Османи по обвинувањата од Македонскиот дипломатски синдикат за упатувањето дипломати во конзулатите и амбасадите на земјава во Њујорк и Будимпешта.

Според Османи, дел од законот кој што предвидува високо дипломатско звање за конзули е сменет во 2015 година, по предлог на тогашниот министер. Не е обврска во критериумите за конзули да имаат високо дипломатско звање.

-Сегашниот конзул кој се врати од Солун е пратен според законското решение. Тука сум многу осетлив и нема да дозволам етничка дискриминација за синдикално организирање, истакна министерот..

МДС обвини дека министерот Бујар Османи за конзул во Њујорк испраќа штотуку вработен во МНР кој нема дипломатско звање.

„Еклатантен пример за непочитување на внатрешните регулативи е упатувањето на  Мухаби Синани на местото Генерален конзул во Њујорк, истото она место на кое министерот Османи не успеа да ја упати во тоа време ТВ презентерката Бесмира Ејупи. Имено,  Синани, кој што од скоро е вработен во МНР од приватна фирма, не исполнува услови за упатување во странство. Тој минатата недела веќе ги има одбрането тезите за упатување без притоа да има стекнато високо дипломатско звање кое е законски услов за именување на генерален конзул.

Дополнително имаме информација и дека оваа недела Синани треба забрзано да полага испити во МНР за унапредување од три нивоа нагоре, како неговото упатување би било приспособено на законските барања за упатување на ниво на генерален конзул. Ваквото забрзано полагање за унапредување од низок во висок ранг на дипломат е противзаконско и спротивно на сите принципи на кариерно напредување, кое што е во директна спротивност со на градењето квалитетна и сериозна дипломатија.

Исто така, дознаваме дека се подготвува упатување на  Илми Селами од Чаир за амбасадор во Будимпешта, поради подигање на партискиот рејтинг на Османи во населбата Чаир.

Како дипломатски синдикат не се согласуваме со хипер партизацијата на дипломатијата и нејзина служба во приватни или партиски интереси, ососбено пред избори. Професионалните стандарди мора да бидат светост за секое идно раководство на МНР.

Приметуваме дека министерот Османи забрзано ги упатува своите најблиски соработници во странство, па така повеќе директори и други политички личности се упатуваат за амбасадори надвор од законски уредената процедура (без презентирање на тезите пред собраниската комисија за надворешна политика), а речиси целиот негов Кабинет забрзано се празни и заминува на различни позиции во странство, што навестува дека актуелното раководство се подготвува за големи промени во Министерствоито за надворешни работи.

Следното раководство на МНР треба да ја прекине ваквата пракса и да обезбеди континуитет на раководењето на нашата институција“, се вели во соопштението на  Македонскиот дипломатски синдикат.

Синани не е единствениот што на брза лента од прием завршува во дипломатско преставништво, а е донесен како кадар на ДУИ во МНР без конкурс, што е класична партизација на институцијата, бидејќи освен што нема соодветен ранг, нема ни доволно искуство за да од илјадници вработени во МНР тој оди на функцијата.