Од каде се владее со Македонија, од „Илинденска“ или од белата палата?

ВМРО-ДПМНЕ парите на граѓаните си ги припишува како свои, а проектите на владата спроведени со нив, како партиски. Откако дојде на власт повеќе соопштенија стигнуваат од седиштето на партијата отколку од „Илинденска“ што го поставува прашањето – од каде се владее со Македонија – од Владата или од штабот на ВМРО-ДПМНЕ  во белата палата?

Во последното соопштение ВМРО-ДПМНЕ објави дека „претседателот на ВМРО-ДПМНЕ, Христијан Мицкоски“ презентирал мега проекти за младите, при што се вулгаризира институцијата Влада за да се промовира партијата со буџетски пари.  Во соопштението целиот проект е пласиран како пропаганден предизборен слоган што ја девалвира самата вест. Во неа стои:  

„ВМРО-ДПМНЕ го прави тоа за младите кои се сила, иднина и нашата надеж, нешто во што мора да се инвестира. ВМРО-ДПМНЕ како владејачка партија ќе реализира низа на мега проекти. Меѓу кои клучни се следните:

Прво, ќе поддржи со новиот буџет кој е во изработка, ваучери во вредност од 250 евра за електронски уреди за сите, за сите студенти во Македонија, за сите до еден.

Второ, ќе обезбеди фонд од 10 милиони евра за развој на бизнис за млади од 18 до 29 години со новиот буџет, во зависност од бизнисот и планот. Посебна комисија под строги критериуми во која ќе членуваат претставници на неколку институции, ќе издвојува средства и ќе ја одредува висината на помошта. Ќе има реален надзор, дали вистински се трошат средствата за таа намена. Вредноста ќе биде од 1.000 евра до 30 илјади евра за проект.

ВМРО-ДПМНЕ верува во младите и во нивниот потенцијал затоа презема вакви мерки. Ова ќе помогне во развивање на државата, рече Мицкоски на  Годишната конференција на УМС на ВМРО-ДПМНЕ. Идејата дека Македонија е жива преживеала во сите премрежја! Македонија е жива и затоа ние инвестираме во нејзината иднината, а тоа се младите“, стои во соопштението од парискиот настан.