Ниту еден бездомник во Македонија не е вакциниран против ковид-19

Ниту еден бездомник во Македонија не е вакциниран против ковид-19. Секретарот на Црвениот крст на Град Скопје, Сузана Тунева Пауновска изјави за „Слободен печат“ дека во моментов се прави проценка дали бездомните лица сакаат да се вакцинираат против ковид-19, а се прави анализа и на нивните хронични заболувања.

-До крајот на јуни планираме да завршиме со проценката, а до крајот на летото и со вакцинацијата на бездомните лица.Важно е да се нагласи дека висок процент, околу 70 отсто од регистрираните бездомни лица имаат здравствено осигурување и нив ќе ги пријавиме преку „вакцинација.мк“.Останатите кои немаат здравствено осигурување ќе ги вакцинираме преку Црвениот крст, вели Тунева-Пауновска.

Според неа, најпогодно ќе биде бездомниците да се вакцинираат со „Синовак“, бидејќи се смета дека оваа вакцина е „најблага“ во однос на симптомите и реакциите кои се појавуваат по нејзино аплицирање.Сепак, засега заинтересираноста кај бездомниците да примат вакцина против Kовид-19 е многу мала.Од Министерството за здравство велат дека вакцинирањето на бездомниците е предвидено за третата фаза од имунизацијата.