Мизрахи соопшти нејзини заклучоци за Онкологија, па даде пауза. СДСМ бара оставка од неа

Членовите на Анкетната комисија за Онкологија на денешната седница не може да се усогласат за заклучоците од досегашната работа за утврдување на политичка одговорност.

Претседателката на Анкетната комисија за скандалот во Онкологија, Рашела Мизрахи, на денешната седница соопшти дека заради прекршување на уставни начела, непостапување согласно надлежностите кои се пропишани во законите од областа на здравствениот систем, како и прекршување на позитивни прописи од подзаконските акти со кои се уредуваат организацијата, работењето и контролата на здравствените установи, политичка одговорност за скандалот во ЈЗУ Универзитетска клиника за радиотерапија и онкологија е утврдено кај поранешниот министер за здравство Венко Филипче, тогашните медицински и економски директор на Онкологија Нино Васев и Нехат Нухи, тогашната директорка Ирина Сотирова-Бухова, тогашните директори на ФЗО Стево Кртсевски и Фатон Ахмети.

По претставувањето на овие заклучоци од Мизрахи, реагираа пратениците членови на СДСМ, кои истакнаа дека не се согласуваат со овие заклучоци оти, како што рекоа, се заклучоци само од членовите на ВМРО-ДПМНЕ.  Тие посочија дека ќе бараат оставка да даде претседателката на комисијата Рашела Мизрахи.

Потоа, Мизрахи даде пауза од еден час.

Пратеникот Ненад Коциќ од СДСМ рече дека пратеничката Рашела Мизрахи ја злоупотребува својата позиција во анкетната комисија за Онкологија и побара нејзина оставка. „Ова е злоупотреба на политичката функција која ѝ ја довери Собранието. Даде пауза од еден нас, а еве помина уште половина час после тоа, нема ниту еден од колегите од ВМРО-ДПМНЕ. Нив не им се во интерес ни вистината, ни пациентите, единствено собирањето политички поени“ рече Коциќ.

Тој побара оставка од Мизрахи.

„Таа ја злоупотреби својата функција на сметка на пациентите и вистината. Своите заклучоци ги презентира како заклучоци на комисијата, а сега бегаат од продолжение, бидејќи нема што да кажат за да го оправдаат своето однесување“ рече Коциќ.

Мизрахи, објаснувајќи ги закличоците, потенцираше дека клучниот документ кој ги утврдува неправилностите во работата на Клиниката за онкологија е извештајот на Државниот завод за ревизија за 2021 година, кој извештај, како што посочи, ДЗР како овластена институција јавно го објавила во април 2023 година,  а кој уште во текот на изготвувањето им бил претставен на раководните лица во Министерството за здравство,  како и директорите во ЈЗУ Клиника за радиотерапија и онкологија.

Мизрахи информира дека мандатот на оваа Анкетна комисија треба да заврши на 3 декември.