„Не сакам да ве изгубам“, им вели германскиот канцелар Мерц на земјите кандидати за ЕУ

Германскиот канцелар Фридрих Мерц по неговиот силен говор на Минхенската безбедносна конференција се вклучи во дискусија за перспективите за проширување на ЕУ, откако претседателот на Црна Гора, Јаков Милатовиќ, му постави прашање во таа насока.

Тој призна дека „се чувствува сè понепријатно“ поради неможноста на ЕУ да постигне значаен напредок во процесот на пристапување.

„Мораме повторно да отвориме нова стратегија, како да ги приближиме овие земји кон Европската унија. Не сакам да ве изгубам“, вели тој.

Тој признава дека има „слон во собата“ бидејќи процесот бара едногласност и Унгарија продолжува да го блокира секој процес, особено за Украина, „но ние мора да го надминеме тоа“.

Тој укажа на унгарските парламентарни избори во април, велејќи дека „по изборите што ќе се одржат во април, се надеваме дека ќе можеме да ги отвориме следните поглавја и да ве доближиме сè поблиску до ЕУ“.