НАТО одобри дополнителни сили за решавање на ситуацијата на Косово

НАТО денеска објави дека „одобриле дополнителни сили за решавање на актуелната ситуација“ на Косово, но веднаш не го прецизираше бројот и не кажа од кои земји.

Судирите меѓу полицијата и вооружените Срби кои се криеја во манастир минатиот викенд претворија мирно село во северно Косово во воена зона.

Косовскиот претседател Вјоса Османи ги обвини Србија и нејзиниот претседател Александар Вучиќ дека се одговорни за нападот на вооружен одред врз косовската полиција на северот од земјата минатиот викенд, велејќи вчера во интервју за Ројтерс дека Косово е „нападно“.

Триесетина тешко вооружени Срби во неделата ја нападнаа косовската полиција во селото Бањска, по што тие се забарикадираа во манастирот на Српската православна црква. Во борбите загинаа тројца српски напаѓачи и еден косовски полицаец.

Досега три лица се обвинети за учество во нападот. Во неделата, полицијата покажа оружје и муниција запленети од напаѓачите, вклучително и автомати на поранешна Југословенска армија, митралези, снајпери, минофрлачи, противтенковски ракетни фрлачи, рачни гранати, мини и беспилотни летала.

Косовскиот премиер Албин Курти изјави дека полицијата пронашла оружје во вредност од пет милиони евра, „доволно за стотици борци“.

Косово, кое прогласи независност од Србија во 2008 година по герилскиот бунт и интервенцијата на НАТО во 1999 година, ја обвинува Србија за вооружување и поддршка на српските борци. Србија, која не ја призна независноста на својата поранешна покраина, го обвинува Косово за поттикнување насилство преку злоупотреба на етничките Срби.