Надмината голготата со возачкиот испит во Битола, од 4 јуни почнува полагањето за возачка

БИТОЛА – Надмината е голготата со полагањето на возачки испит во Битола, по повеќе од пет месеци, Битола добива нов оператор за полагање за возачка дозвола.

Авто мото испитен центар – Супер возач ДООЕЛ Битола е правниот субјект кој во наредните пет години по овластување на Министерството за внатрешни работи, ќе ги спроведува возачките испити за кандидатите за возачи од општините Битола, Прилеп, Ресен, Демир Хисар, Крушево и Македонски Брод.

На 4 јуни (среда) во Битола ќе започне со работа новиот центар за полагање на возачки испити кој се наоѓа во просториите на поранешниот Славјански универзитет во Битола.

Досега се’ во Битола и околните општини беше закочено за добивање на возачка дозвола. Оние што требаше да полагаат за возачки испит одеа во Охрид, Кавадарци или Кичево. Граѓаните беа револтирани поради зголемените трошоци, и јавно реагираа како може МВР да не најде оператор навреме. Гневот беше голем и кај авто-школите кои губеа пари и значително им се одрази на нивната финансиска состојба особено што требаше да им даваат плата на вработените во услови кога не заработуваат.

Во известувањето до медиумите стои дека операторот АМИЦ Супер возач Битола е со седиште во Битола и шест места каде што ќе може да се пријавува за полагање: во Битола, Прилеп, Ресен, Демир Хисар, Крушево и Македонски Брод. Поседува три автодроми за полагање на прв практичен испит во Битола, Прилеп и Ресен како и три центри за полагање на теоретски испит во Битола, Прилеп и Ресен.

За полагање на првиот и вториот практичен испит АМИЦ Супер возач Битола на кандидатите за возачи им става на располагање триесетина стандардизирани возила од сите категории.

„Возачките испити во АМИЦ Супер возач Битола ги спроведуваат лиценцирани испитувачи, доминантно од редот на дипломирани сообраќајни инженери со долгогодишно искуство во едукација и тестирање на кандидати за возачи. Непосредно по официјалниот почеток со работа, АМИЦ Супер возач Битола ќе започне со прием на пријави за полагање на возачки испити како и со закажување и објава на распоредот за полагање на првите испити“, известува новиот оператор.

Проблемот Битола да остане без испитен центар за полагање на возачка дозвола настана на 15 декември лани, кога заврши договорот со претходниот оператор. Пропаднаа неколку огласи, па МВР на 9 април распиша нов оглас за избор на правен субјект за добивање на лиценца за испитен центар во Битола.

Финансиски штети трпеа и граѓаните и авто школите во Битола. Налето и напролет се запишуваат матурантите, само од нив таа бројка на засегнати изнесува над 1.000 кандидати. Вкупните трошоци за една возачка дозвола изнесуваат околу 42.000 денари. 

„Ова е брука, важно парите ги уплативме сега ќе чекаме да ни помине рокот за пак да ни ги земат парите“, коментираа граѓани на социјалните мрежи и бараа информација што им се признава од веќе положеното, каде да одат да се информираат, во кој град, колку ќе им треба за дополнителен трошок и слично. 

Во Битола ги има шест авто школи, а вкупно во сите засегнати општини кои се под Секторот за внатрешни работи Битола се над 100 вработени, од кои дел инструктори, предавачи на теорија, членови на комисии за полагање.

Инаку, градоначалникот на Битола Тони Коњановски, во април најави субвенции од 6.000 денари за полагање на возачки испит за младите од Општина Битола, и најави дека планираните средства ќе влезат во ребалансот на буџетот.

И Општина Новаци објави Јавен повик за користење на финансиски средства за субвенционирање на трошоците за обука, полагање и добивање на возачка дозвола од Б категорија , наменет за млади лица до 26 години. Субвенцијата е 10 илјади денари за апликант.