Музејот на македонската борба за самостојност ќе одбележи 15 години од основањето
Националната установа Музеј на македонската борба за самостојност денеска ќе одбележи 15 години од основање со свечена програма, во рамки на која ќе бидат презентирани дел од изложбените, издавачките и програмските активности реализирани во изминатите години.
По повод јубилејот, во музејот ќе биде отворена ретроспективна изложба на плакати од реализираните изложби, како и презентација на избрани печатени изданија и каталози објавени во изминатите петнаесет години.
Во рамки на програмата ќе биде прикажана и видеопрезентација со архивски материјали, преку која посетителите ќе имаат можност да се запознаат со досегашната работа на установата и реализираните проекти.
Од музејот посочуваат дека одбележувањето на јубилејот претставува осврт кон изложбите, проектите и соработките што ја обележале работата на институцијата во изминатите 15 години.
На свеченоста, која ќе почне во 19 часот, ќе бидат доделени и благодарници на поединци и институции кои придонеле за развојот и поддршката на работата на Музејот на македонската борба за самостојност.