„Мош“ и „Интермецо“ повторно казнети за бучава, треба да платат 13.000 евра

Кафулињата „Мош“ и „Интермецо“ повторно се казнети за зголемена бучава, аинспекторите изрекле казна од 13.000 евра, која треба да ја платат во рок од осум дена.

Инспекцијата на Општина Центар спровела акција за мерење бучава по  пријави од граѓани за зголемена бучава од гласна музика од угостителските објекти на територијата на општината.

Мерењето е спроведено со овластена лабораторија за животна средина „Еуромак контрол“ Скопје, во раните утрински часови.

-Акциите се спроведоа на целата територија на Општината, при што беа поминати клучните точки, односно локалите за кои што редовно има пријави од граѓани, конкретно во населените места Дебар маало, Буњаковец, Центар и Капиштец. Извршено е мерење на бучавата на два угостителски објекти: Мош и Интермецо – соопштија од Општина Центар.

По извршените мерења на бучава, овластената лабораторија за животна средина ги достави
извештаите од мерењата, врз основа на кои се спроведени инспекциски постапки, со платен налог за глоба за сторен прекршок согласно Законот за заштита од бучава во животна средина.

Правните лица можат да платат половина од казната во рок од 8 дена. Доколку не ги платат
казните во висина 13.000еур, овластениот инспектор ќе достави Барања за поведување
прекршочна постапка пред Основен суд, Оддел за прекршоци.

Општина Центар постојано добива поплаки од граѓаните за гласна музика и непочитување на
работното време по што во неколку наврати досега има изречено казни за бучава. Општина
Центар повторно апелира до сите управители и сопственици на угостителски објекти во
општината, да се придржуваат до постоечките правилници, да имаат обзир кон жителите кои
живеат во непосредна близина на нивните локали и да се придржуваат до Законот за заштита од бучава во животната средина.

Претходно, ваква акција имаше во април, кога истите кафулиња беа казнети за зголемена бучава.