Mirënjohje policëve që mbrojtën Zaevin, me 27 Prill, ndërsa për shpëtuesin e Selës, paraburgim!

Aleanca për Shqiptarët reagon në lidhje me ndarjen e shpërblimeve për njësin policore që shpëtoi deputetët në 27 prillin e përgjakshëm të vitit të kaluar në Kuvend. Sipas ASH-së, përderisa policët që dolën në mbrojtje të Zaevit u shpërblyen nga ana tjetër shpëtuesi i Selës u “shpërblye” me paraburgim.

“Sasho Tasevski, Aco Angellovski dhe Ljupço Janeviq të cilët më 27 prill si pjesë e sigurimit të ministrit të Punëve të Brendshme, Oliver Spasovski, mbrojtën Zoran Zaevin dhe deputetët tjerë, sot kanë marrë mirënjohje për kontribut të veçantë gjatë punës në MPB.
Mirënjohjet ju ndanë në Shtip, ku u shënua Dita e Policisë së Maqedonisë, përcjell Telegrafi Maqedoni.
Përndryshe, pas ndërrimit të pushtetit Tasevski u emërua komandant në Departamentin për sigurim ose në të ashtuquajturën Drejtorinë e Gjashtë të MPB-së, Angellovski u vendos në krye të Sektorit për sigurim parandalues në MPB, ndërsa Janeviq komandant në Njësitin e sigurimit të Zoran Zaevit.
Ndërsa ministri Oliver Spasovski ka paralajmëruar rritje të pagave për zyrtarët policorë nga 1 dhjetori i këtij vitit.
Kujtojmë opinionin se polici shqiptar Feta Alimi , i cili shpëtoi deputetin dhe liderin e ASH Ziadin Sela, jo që nuk u shpërblye, por ai u burgos dhe tani gjendet në paraburgim dhe rrezikon të denohet me shumë vite burg”, thuhet në reagimin e Aleancës për Shqiptarët.