Марта Кос: ЕУ не смее да добие „тројански коњ“ со проширувањето

Еврокомесарката за проширување, Марта Кос, во Талин изјави дека Европската унија не смее да си дозволи да добие „тројански коњ“ во новиот процес на проширување, поради што таа предлага новите договори за пристапување да содржат посилни заштитни мерки кога станува збор за почитување на „фундаменталните принципи“, а Црна Гора би можела да биде првата со таков нов вид договор.

Во Талин, на состанок посветен на проширувањето, Кос нагласи дека новите договори за пристапување треба да содржат посилни заштитни мерки против кршење на обврските преземени за време на преговорите за пристапување, со цел да се обезбеди новите земји-членки да продолжат да го одржуваат својот минат успех во однос на законодавството на ЕУ.

Додека Црна Гора работи на затворање на сите поглавја, нејзиниот договор за пристапување треба да биде првиот од новата генерација. Секоја заштитна мерка треба да остане во сила сè додека е потребно, рече Марта Кос и нагласи дека овој вид договор не треба да создава „двостепено членство“ за земјите кои се целосно усогласени со законодавството на ЕУ.

Едноставно кажано, ако новите членки ги следат правилата, тие дури и нема да ги забележат овие заштитни мерки, истакна Марта Кос.

Според неа, ако земјите „назадуваат“ во однос на темелите на ЕУ, како што се демократијата и владеењето на правото, заштитните мерки мора да бидат таму како предупредување.

Таа најави дека планот е да се испрати овој предлог за пристапниот договор до Советот на ЕУ, за да можат земјите-членки да ја продолжат оваа дискусија.

Марта Кос рече дека борбата против корупцијата и градењето демократски институции остануваат основа на проширувањето на ЕУ и дека полноправното членство не смее да биде на сметка на овие фундаментални реформи.

Само кредибилен реформски пат може да ја зајакне довербата кај земјите-членки и граѓаните на ЕУ и да обезбеди правилно функционирање на внатрешниот пазар и на Унијата како целина. Без таква доверба, проширувањето на ЕУ никогаш не може да биде успешно, рече Марта Кос.