Маричиќ на местото на Груби како прв вицепремиер

 Во техничката влада која треба да ја предводи Талат Џафери, а која Собранието треба да ја избере в недела на 28 јануари, Бојан Маричиќ ќе биде прв вицепремиер задолжен за европски прашања, додека Артан Груби останува вицепремиер и министер за политички систем и односи меѓу заедниците, пишува „Слободен печат“ .

Според објаснувањето, ротацијата на Груби и Маричиќ на првото вицепремиерско место е затоа што првиот заменик на претседателот на Владата треба да биде од спротивната партија во владината коалиција. Во случајов, претседателот на Собранието Џафери, кој се очекува денеска да поднесе оставка за потоа да биде номиниран за премиер на техничката влада е од ДУИ, партија од која е и актуелниот прв вицепремиер Груби. Според тоа, прв вицепремиер треба да биде од СДСМ, односно на таа функција ќе биде предложен актуелниот вицепремиер за европски прашања Бојан Маричиќ.

Според владиниот функционер, во техничката влада ќе нема промена на министрите, односно освен министрите за внатрешни работи и за труд и социјала и дополнителните заменици министри во ресорите финансии, информатичко општество, земјоделство, кои доаѓаат од опозициската ВМРО-ДПМНЕ, останува актуелниот владин состав.

ВМРО-ДПМНЕ пак, синоќа на седница на Извршниот комитет ги утврди кандидатите за министри и дополнителни заменици министри. Така, за министер за внатрешни работи е предложен Панче Тошковски, актуелен претседател на правната комисија на ВМРО-ДПМНЕ и долгогодишен адвокат. За нов дополнителен заменик министер за финансии е предложена Елена Петрова, професионалец во областа на финансиите. Ѓоко Велковски е нов предлог за кандидат за министер за труд и социјална политика, а за нов дополнителен заменик министер за информатичко општество и администрација е предложен Стефан Андоновски, досегашен меѓународен секретар на партијата и советник во Советот на Град Скопје. Цветан Трипуновски е предложен за дополнителен заменик министер за земјоделство, шумарство и водостопанство.