Македонија влегува на светската мапа на планинарски патеки
Проектот Македонска бесконечна трансверзала, познат и под уметничкото име Sammiana, се развива со брзо темпо и веќе оваа година се очекуваат првите странски планинари.
Целото источно крило во должина од 1166 км е веќе дигитално мапирано со сите потребни информации за трасата на оваа наша планинарска мегапатека, пренесе Fakulteti.mk.
Она што е можеби најважно е дека четири секции од источното крило веќе се дел од светската Open Street Map, односно веќе се наоѓаат на сите популарни апликации што ги користат планинарите од целиот свет. Со ова Македонија се вброи на списокот на земји со понуда за долгометражно пешачење и планинарење, односно конечно почнува да се искористува потенцијалот на она што Македонија може да го понуди.
Најголемиот предизвик при маркирањето со кој се соочува асоцијацијата е како што се очекуваше – дивата, а на некои места и легалната сеча на шумите, што води кон уништување не само на маркациите, туку и на самата патека.
Се очекува до крајот на оваа година да биде комплетирано и дигитално мапирано и целото западно крило во должина од 870 км, со што ќе се комплетира целата трансверзала со вкупна должина од 2.070 км, најдолга на Балканот и една од најдолгите во Европа и светот.
Секоја секција по една трансверзала
Секоја секција од Македонската бесконечна трансверзала е воедно и посебна трансверзала сама по себе, па така на светската Open Street мапа веќе се трансверзалите I1- Партизанска, I2 – Јужна Македонска , I3 – Спили и водопади и I4 – Источна Македонска во вкупна должина од 708 км. Во следниве месеци на OSM мапите ќе бидат мапирани и I5-Осоговска, I6 – Славишка и I7 – Историска трансверзала.
Европски патеки
Европските патеки Е1 – Е12 се мрежа на долги пешачки патеки кои поминуваат на територијата на цела Европа.
Со самото комплетирање се создаваат услови еден огранок од трансверзалата да стане дел од официјалните европски патеки, поточно дел од рутата Е7 која започнува од Португалија и води преку Шпанија, Франција, Италија, Словенија, Унгарија и во моментов завршува во Србија, поточно на нашата северна граница. Дополнително, во иднина ќе може многу лесно, преку кратки странични патеки да се поврземе и со европските патеки Е4, која поминува низ Бугарија, и Е6 во Северна Грција.
Голем бенефит за руралниот туризам
Овој тип туристи се задржуваат многу подолго, што значи голем бенефит за македонскиот туризам и економија, а посебно за развој на средините низ кои поминува трансверзалата. Земајќи предвид дека посетителите се движат во руралните предели на земјата, каде што ги вршат своите набавки и ги користат услугите на локалната заедница, повеќе од очигледни се придобивките за овие подрачја и нивниот развој.
Што е всушност Македонска бесконечна трансверзала?
Македонска бесконечна трансверзала (кодно/уметничко име Sammiana ) е кружна мегатрансверзала – непрекината планинарска патека која поминува низ поголемиот дел на територијата на Македонија, поминувајќи директно или во непосредна близина на огромен број природни убавини, историски локалитети и други знаменитости. Проектот се реализира од страна на асоцијацијата Македонска бесконечна трансверзала и досега се трасирани и дигитално мапирани над 90% од трасата, а јавно од неодамна е достапно целото источно крило во должина од 1.166 км.
Се работи за огромен и импозантен проект, не само поради импресивната должина, туку и поради тоа што поголемиот дел од трансверзалата, односно околу 1.500 км се нови патеки кои наменски се трасираат. Дополнително, со трасата се промовираат и многу предели кои се помалку познати за планинарската заедница и на некој начин се неправедно запоставени и покрај својата убавина.
Повеќе информации за новата македонска мегатрансверзала може да се најдат на веб-страницата www.sammiana.com