Македонија го одбила „Рајанер“: Државата ќе банкротираше од нивните барања, вели Николоски
„Рајанер“ побарал повеќе од двојно повеќе од постојните субвенции, што Македонија вообичаено им ги дава на авиокомпаниите
Македонската влада не успеа да постигне договор со „Рајанер“ за влез на нивниот пазар и ги означи барањата на ирскиот нискобуџетен превозник како „невозможни“.
Министерот за транспорт на Македонија, Александар Николоски, изјави дека имале неколку средби со претставници на ирската нискобуџетна авиокомпанија „Рајанер“, објави порталот за авиоиндустрија „Екс-ју авиејшн“ (Ex-Yu Aviation).
„Се сретнавме со нив два или три пати. Причината зошто не се на нашиот пазар се условите што ги поставија. Во пракса, тие сакаат аеродромите во Скопје и во Охрид да бидат опслужувани исклучиво од ‘Рајанер’, што би значело дека државата би трошела огромни суми пари само за нив. Тие исто така бараат времето помеѓу слетувањето и полетувањето да трае максимум 35 минути. Ова би нè натерало да вработиме неколку стотици дополнителни работници на аеродромите само за да ги задоволиме нивните потреби“, изјавил за порталот министерот и потпретседател на македонска влада.
Тие побараа двојно повеќе субвенции
Николоски нагласи дека во преговорите, „Рајанер“ побарал повеќе од двојно повеќе од постојните субвенции, што Македонија вообичаено им ги дава на авиокомпаниите.
„Велат дека понудените субвенции се премногу ниски. Во моментов, ние ги субвенционираме авиокомпаниите на аеродромот во Скопјe со девет евра по патник, а на аеродромот во Охрид со дванаесет. ‘Рајанер’ бара дваесет евра по патник во Скопјe, а 25 во Охрид. Со такви услови, соработката не е можна. Државата веќе издвојува значителни средства за субвенции, а посебните услови за ‘Рајанер’ би го нарушиле пазарот. Не можете да ѝ дадете на една компанија привилегии што другите ги немаат. А ако такви услови им се дадат на сите, државата би банкротирала“, предупреди Николоски, наведува „Екс-ју авиејшн“ .
„Рајанер“ размислува да влезе на македонскиот пазар веќе една деценија. Уште во 2015 година, тие објавија планови за летови до Скопјe и потврдија разговори со владата за повеќе линии. Набргу потоа, „Визер“ одговори на овие најави со воведување нови рути од Скопјe до постојните бази. Идејата беше повторно разгледана во 2018 година, но без резултати.
„Визер“, кој моментално доминира на македонскиот пазар со повеќе од 50 проценти удел во бројот на патници, неодамна објави стационирање на шести авион во својата база во Скопјe и воведување на седум нови линии, пишува „Екс-ју авиејшн“.