Македонија, Црна Гора и Албанија: Недвижностите како скапоцености

Во Црна Гора, поранешната тврдина Мамула, позната по својата темна историја, е претворена во луксузен хотел.

На албанската ривиера, во близина на Валона, е изграден ексклузивниот комплекс „Зелен брег“, додека во Драч се реализира амбициозен проект за реконструкција на главното пристаниште, вклучувајќи луксузна марина и станбен и угостителски центар, пишува германскиот економски весник „Ханделсблат“.

Весникот посочува дека големите хотелски синџири како „Хилтон“, „Мeриот“ и „Интерконтинентал“ сè повеќе инвестираат во регионот, што се толкува како знак на доверба во туристичкиот потенцијал.

Туризмот е главната гранка
Текстот нагласува дека промените се видливи и го цитира Ерион Метоја од „Албанија Имобилиен Инвест“: „Пазарот на недвижности во Албанија веќе добро се разви, продажбата е зголемена трипати до четирипати“.

Сепак, цените се уште се релативно ниски, оценува весникот. „Овие пазари сè уште се сметаат за скриени бисери на Европа, а земјите се сè попопуларни меѓу туристите.“

Се наведува дека минатата година Албанија ја посетиле околу 11,7 милиони странски туристи, што е зголемување од 15 проценти во споредба со претходната година. Туризмот во Албанија сочинува околу една четвртина од бруто-домашниот производ, пишува Ханделсблат и додава дека Црна Гора, исто така, бележи сличен удел во туризмот.

„Економскиот раст е забележлив: оваа година албанската економија треба да порасне за околу 2,4 проценти, во Црна Гора за околу 3 проценти, а во Северна Македонија за 3,2 проценти“, се додава во текстот.

Во текстот се наведува дека преговорите за пристапување кон ЕУ дополнително го поттикнуваат оптимизмот на пазарот на недвижности во регионот. „Аналитичарите посочуваат паралела со Хрватска, каде што цените на недвижностите пораснаа по развојот на туризмот и влезот во ЕУ.“

Особено во Албанија, инвеститорите се привлечени од комбинацијата на растечка побарувачка, поволни цени и ограничена понуда на атрактивни локации.

Колкава е стапката?
Исто така, се забележува дека „цените на недвижностите во Албанија значително варираат во зависност од локацијата. На север, тие се движат помеѓу 1.000 и 1.500 евра за квадратен метар, додека во јужните туристички центри можат да достигнат од 5.000 до 6.000 евра“, вели Метоја.

Во текстот понатаму се наведува дека во Скопje, главниот град на Северна Македонија, „нови станови можат да се купат по цена од 1.500 до 2.500 евра за квадратен метар“.

„Во Црна Гора, во Котор или Добра Вода, становите можат да се најдат во сличен ценовен опсег, додека куќите со базен чинат помеѓу 500.000 и 750.000 евра“, пишува Ханделсблат.

Весникот предупредува дека купувањето недвижности во странство не е лесно и дека експертите советуваат да се избегнува самостојно купување и да се ангажира агенција.

Експертите, исто така, предупредуваат на „правни ризици, можни еколошки прописи и недостаток на ликвидност, што може да биде проблем за препродажба“.

„Сепак, секој што пристапува внимателно и работи со сигурен партнер, не само што може да открие атрактивни дестинации за одмор, туку и да профитира од потенцијалното зголемување на вредноста на недвижностите“, заклучува Ханделсблат.