Луѓето кои живеат меѓу многу зеленило изгледа дека стареат побавно на клеточно ниво

Поминувањето време во природа во природа прави чуда за нашето тело; од подобро ментално здравје до поздраво срце и посилен имунолошки систем. Затоа некои лекари буквално препишуваат престој во природа како форма на лекување. Новите истражувања нашле потенцијално објаснување за некои од овие придобивки. Имено, се чини дека луѓето кои живеат во области со многу зеленило најчесто имаат помлада биолошка возраст.

„Оваа студија беше обид да се квантифицираат корисните ефекти на зелените површини на клеточно ниво“, рече социјалниот еколог Арон Хип од Државниот универзитет во Северна Каролина. Научниците анализирале 7.827 субјекти и средината во која живеат и откриле дека оние кои живеат на места со многу паркови, градини, дрвја и друга вегетација имаат подолги теломери. Теломерите се краеви на хромозомите и се поврзани со долговечноста.

Стареење и теломери
„Ова беше исто без разлика на расата, економскиот статус или дали испитаниците пушеле или пиеле алкохол“, објасни Хип. Секој пат кога клетката се дели, теломерите стануваат пократки, додека клетката повеќе не може да го дели својот генетски материјал.

„Ова ги прави теломерите важни маркери за биолошката старост, односно тие покажуваат колку се „истрошени“ нашите клетки. Знаеме дека стапката на абење на теломерите може да биде под влијание на различни фактори, како што е стресот“, рече Скот Оглетри од Универзитетот во Единбург, објави Science Alert.

Веќе е познато дека зелените површини го ублажуваат нивото на стрес. Растенијата штитат од високи температури, го намалуваат загадувањето на воздухот и бучавата. Зелените површини поттикнуваат физичка активност и социјални интеракции и се поврзани со помал ризик од криминал.

„Да се ​​биде „зелен“ може да ја намали биолошката возраст на една личност за 2,2 до 2,6 години“, пресметале Оглетри и неговите колеги.

Проблемот со загадувањето на воздухот
Но, моќта на природата има свои граници. Кога научниците ги земаа предвид факторите на ризик како што е загадувањето на воздухот, позитивните ефекти од зелените површини исчезнаа.

Дополнително, научниците забележаа дека влијанието на природната средина не е толку изразено кај жените, кога се гледа како посебна група, што сугерира дека дополнителните ризици од болеста или стресот може да играат поголема улога во должината на теломерите.

Истражувањето под наслов „Поврзаноста помеѓу изложеноста на зелените простори и должината на теломерите во Националното истражување за здравствени и нутриционистички испитувања“, беше објавено во списанието Science of the Total Environment.