Ковачевски се обрати до граѓаните: Го разбирам гневот по настаните во Битола

 

Откако Македонија беше зафатена од вител на жестоки реакции по контроверзното отворање на Културниот центар на Бугарите „Иван Михајлов“ во Битола, премиерот Димитар Ковачевски изјави дека „со последната посета на бугарската делегација во Битола се разбудија духовите од минатото“. И дека „провокации кои ги повредуваат нашите чувства како граѓани ја загрозуваат определбата за членство во ЕУ“.

 

Во видео обраќањето до граѓаните Ковачевски вели дека провокациите по повод отворањето на бугарскиот клуб во Битола поттикнаа говор на омраза и недоверба со намера да го поткопаат и стават под сомнение досегашниот напредок во дијалогот меѓу Скопје и Софија. Но во тој дијалог, вели Ковачевски, ниедна од страните не смее да прави чекор назад. 

Еве го обраќањето на Ковачевски во целост: 

 

„Почитувани граѓани,

Од првиот ден на мојот мандат како премиер, реков дека не отстапувам од тоа разговорите меѓу Северна Македонија и Бугарија да се водат достоинствено и во духот на европските вредности. Кон оваа определба се придржувавме цел овој период. Реализиравме конкректни заеднички проекти, ги подобривме односите и го намаливме говорот на омраза.

За жал, со последната посета на бугарската делегација во Битола се разбудија духовите од минатото поттикнувајќи го повторно говорот на омраза и недовербата против кои успешно се боревме. Оттука, целосно го разбирам и чувствувам гневот на граѓаните во изминатите денови.

Нашата држава ја стекна својата независност по Втората светска војна во која граѓаните учествуваа во антифашистичката народноослободителна војна. Антифашистичката определба на граѓаните е дел од нашиот национален идентитет со кој се гордееме во демократска Европа.

Македонските граѓани се определени за членство во ЕУ, но провокации кои ги повредуваат нашите чувства како граѓани ја загрозуваат таа определба.

Република Северна Македонија е суверена држава и имаме должност да го чуваме нашето достоинство. Имаме стратешка цел за влез во ЕУ, но достоинствено со својата национална гордост и посебност.

Верувам дека треба да продолжиме и да работиме на зајакнување на дијалогот и унапредување на односите меѓу двата народи до конечно решавање на спорот. Но, за тоа да биде успешно, ниедна од страните не смее да прави чекори назад. Не смееме да дозволиме постојано враќање кон минатото и потези кои значат еднодневна политичка корист, а долгорочна штета на кревките односи кои ги градиме.

Република Северна Македонија ќе ги продложи реформите во сите области со кои ќе ја подготвиме земјава за полноправно членство во Унијата. Тоа се процеси кои ги водиме за наше добро, за развој на нашата земја и подобри услови за граѓаните“, рече во видео обраќањето премиерот Димитар Ковачевски.