Ковачевски лично ја однесе оставката во Собранието
Ковачевски е горд што бил премиер, убеден е дека и по 8 мај ќе ја предводи владата, а верува дека Талат Џафери ќе го задржи стратешкиот правец
Нестандардно за македонски прилики, премиерот Димитар Ковачевски претпладнево лично ја достави својата оставка во Собранието. Со тој негов чекор во оставка е целата Влада до изборот на техничката влада во недела на 28 јануари.
Премиерот Ковачевски имаше куса изјава за медиумите пред Собранието во која рече дека државата и за време на техничкиот премиер Талат Џафери ќе го задржи стратешкиот правец.
„Стилот ни е различен, но Џафери е искусен политичар со големо искуство во водењето на парламентот“ и тоа е гаранција за добра работа на техничката влада.
„Имавме неформална средба со министрите на којашто им се заблагодарив за напорната работа во овие изминати две години. Денеска, како што кажав, ќе го направам тоа што е предвиено со закон. Мојата оставка е потпишана, сега ќе ја однесам во архивата. Ќе се видиме со претседателот на Собранието, ќе му посакам успешна процедура до недела, а потоа и негов успешен избор за технички премиер“, рече Ковачевски.
Ковачевски изрази убедување дека по 8 мај тој ќе ја предводи новата влада.
„Јас дојдов со друго искуство во водење на корпорации, така што, веројатно стилот ќе биде различен, меѓутоа државата секако дека ќе го задржи својот стратешки правец, а тоа е западната ориентација, стратешкото партнерство во САД и техничката влада исто ќе се грижи за граѓаните бидејќи се уште сме во криза така како што ние тоа го правевме во изминатите две години. Ова е нешто што е предвидено според закон, на 9 мај повторно владата ќе ја предводам јас и ова парламентарно мнозинство кое што ќе обезбеди полноправно членство на Македонија во ЕУ до 2030 година“, рече Ковачевски.
Тој рече дека имал чест и гордост да биде претседател на влада.
„Јас имам кажано многу пати пред медиумите дека ниеден човек не се родил ниту да биде претседател, ниту да биде пратеник, ниту да биде градоначалник, тоа е нешто што му припаѓа како чест во текот на неговата професионална кариера. Јас ја имав таа одговорност и таа чест да ја водам Владата во едно исклучително време, во време на многу и меѓународни турбуленции, меѓутоа пред сѐ на економски турбуленции предизвикани од војната во Украина. Сметам дека се грижевме за сите. Сметам дека обезбедивме сѐ она што беше да ги задржиме работните места, да ја задржиме ликвидноста на компаниите и да обезбедиме приходи на најранливите категории на граѓани преку најголемите пакети на антикризни мерки коишто која било земја во регионот ги направи. Не дозволивме ценовен шок, не дозволивме рестрикции на електрична енергија. Не дозволивме енормно покачување на цените на нафтените деривати. Ја намаливме инфлацијата за шест пати од 20 на 3,5 проценти и сметам дека, како што кажав, сите министри во Владата, замениците-министри, службите коишто работат во сите институции треба да бидат горди на тоа што го направија за својата држава во изминатите две години“, рече Ковачевски.
Според вчерашните најави на претседателот на Собранието, тој откако ќе ја прими оставката на Ковачевски, ќе го информира претседателот на државата Стево Пендаровски за тоа, а потоа во текот на денот и тој ќе поднесе оставка.
Оставката на Ковачевски е првиот формално-правен чекор кон формирање на техничка влада што треба да биде избрана на 28 јануари.