Кој е филмот за кој се протестираше на Филмскиот фестивал во Торонто?
Торонто- Тензии ја одбележаа светската премиера на документарецот „The Road Between Us: The Ultimate Rescue “ на Филмскиот фестивал во Торонто, каде што во среда се судрија пропалестински и произраелски демонстранти.
Надвор од салата „Рој Томсон“, околу сто полицајци мораа да постават барикади за да ги разделат двете групи кои се обидуваа да се засенат една со друга со мегафони, сè поради филмот, кој ја следи мисијата за спасување на семејството на пензиониран израелски генерал на 7 октомври 2023 година, објавува „Холивуд репортер“.
Спротивставени ставови
Организаторот на пропалестинскиот протест, кој се претстави како Анас, за „Холивуд репортер“ изјави дека се противат на она што го сметаат за израелска пропаганда во документарецот на режисерот Бери Аврих. „Овој протест е тука за да помогне во едукацијата на луѓето за тоа што се случува и да се расчисти дезинформацијата и израелската пропаганда“, рече тој.
Од друга страна, Винстон Сигел, еден од произраелските контрадемонстранти, застана во одбрана на филмот. „Тоа е многу легитимна приказна за човек кој се обидува да го спаси своето семејство во ужасни околности. Тоа е приказна што тие сакаат да ја прикажат како пропаганда“, рече Сигел.
Позадина на контроверзноста
Филмот ја следи приказната за пензионираниот израелски генерал Ноам Тибон, кој на 7 октомври 2023 година го спасил своето семејство, вклучувајќи го и својот син, од напад на Хамас врз кибуцот Нахал Оз. Проекцијата на филмот предизвика контроверзии дури и пред неговата премиера.
Имено, организаторите на фестивалот (TIFF) првично одлучија да не го прикажуваат филмот на овогодинешното издание и покрај поканата до режисерот. Одлуката беше променета дури по силниот протест од еврејската заедница во Торонто, кога беше постигнат договор со режисерот Аврих во врска со безбедносните прашања. Токму гласните, но мирни протести сакаа да ги избегнат организаторите.
Тешки обвинувања од двете страни
Меир Вајнштајн, основач на организацијата „Израел сега“ и организатор на израелскиот контрапротест, ја обвини другата страна дека се обидува да ги „избели“ акциите на Хамас на 7 октомври. „Тие сакаат да кажат: „Не, не. Хамас никогаш не го направил ова. Ние сме невини, мили луѓе. Но, тие ги мразат Евреите. Тие сакаат Израел да биде целосно уништен и затоа се тука“, рече Вајнштајн.
На неговиот став се спротивстави Тарек Хаџ Ебрахим, пропалестински демонстрант, кој ги повтори обвинувањата за пропаганда. „Целиот филм е лажен и содржи лажни информации. Ние сме во овој конфликт 100 години. Знаеме како ги извртуваат фактите, како ја фалсификуваат историјата“, рече Ебрахим.