Кочани му порача на Скопје: Болката е наша, но борбата е заедничка!

„63 сенки ќе ве следат – секој поглед бара правда“.  Со ваков транспарент и слики од жртвите во пожарот во дискотеката „Пулс“ родителите од Кочани денеска го предводат протестниот  „Марш за ангелите“во Скопје. „Сенките“ се бројот на жртвите за кои, четири дена пред почетокот на судењето за случајот, родителите бараат правда.

Одзивот на скопјани на маршот беше масовен така што на него учествуваат неколку илјади граѓани. И овојпат немаше преставници од власта да ги дочекаат во главниот град. Маршот започна точно во 12:05 часот на плоштадот „Македонија“, од каде учесниците се упатија кон Собранието, а завршницата ќе биде пред Основниот кривичен суд. Маршот е мирен, има и редари, а учесниците во моментов се движат кон Собранието.

„Ние родителите скапо го плативме данокот на корупцијата“, „Колку детски животи треба да згаснат за вие да се разбудите?!“, „Кој ќе ни ги врати другарите?“, „Тишината е соучество“, „Профит во крв“, „Крени го гласот пред да е касно“,  „Моето дете беше убиено од систем кој не штити туку убива“ -се само дел од преостанатите транспаренти со кои маршираат учесниците.

„Нашите деца умреа на 16 март. Шеесет и три деца кои никогаш повеќе нема да ги видиме. Не бараме од вас милост, бараме да ни се придружите во борбата за правда, затоа што нашите деца го заслужуваат тоа. Маршираме за вистината. Болката е наша, но борбата е за сите нас. Ни треба ваша поддршка“, порачаа претходно родителите во најавна видеопорака за маршот.

Ова е прв марш во главниот град организиран од граѓанските иницијативи „Кој е следен!“ и „16 Март 2025“, по неколкунеделните саботни собири што ги организираа родителите во Кочани. Нивната порака и натаму силно одекнува. Родителите очекуваа масовно присуство, нагласувајќи дека нема да се откажат сè додека не се утврди целосна одговорност за трагедијата.

Организаторите претходно порачаа – „Дојдете и бидете со нас. Секоја поддршка значи сила, секој човек е важен. Да застанеме заедно и да покажеме дека болката не нè скршила, а борбата за вистинска правда продолжува.“

Родител на едно од загинатите деца, праша зошто нема сплотеност.

„Како ние што го изгубивме најмилото, не дај Боже никој да го изгуби, навистина не му посакувам никому. Сите имаа многу желби, сите имаат визија, но зошто овие деца немаа иднина? Зошто мораше ова да се случи, зошто нема сега сплотеност? Јас сум од село, кај нас емпатијата е навистина голема, од 100 луѓе – 55 се тука, ама не се сите. Треба да се соберем сите, бидејќи во нас е моќта. Јас живеам само за борбата за правда, живеам за борбата за мојот син Александар да знае од кого погинал, но живеам и ќе се борат и не смеам да умрам додека нема правда“, кажа тој.

„Ова Собрание има видено како светот се обединил за овој град да се изгради, а тие што направија? Отидоа две недели на одмор. Било премногу сензитивно за да се состанат. И што направија кога се вратија? Не може да формираат обично мнозинство за поддршка и финансиска помош на семејствата и жртвите од пожарот во Кочани. Подобро да не се вратеа од одмор. Не можеа да соберат мнозинство ниту за јавна расправа за јавно да се дискутира кој е крив“, кажа Борјан Ефтимов од Иницијативата „Кој е следен“.

Пред Кривичниот суд, се скандираше „Правда за Кочани“, а семејствата на загинатите побараа правично, транспарентно и навремено судење.

„Нашите најмили не се меѓу нас, но нивната судбина не смее да биде заборавена или скриена зад институционални пропусти, интереси или политички пресметки. Ние сме нивниот глас и тој глас ќе остане гласен, јасен и непоколеблив. Бараме судење без одложување, без притисоци, без прикривања на докази, без селективност. Да се слушне секој факт и да се утврди секоја одговорност, колку и да е непријатна“, порача Розеа Џамова, сестра на Јорданчо Џамов – еден од загинатите во „Пулс“.

Во меѓувреме, Кривичниот суд, Обвинителството и Адвокатската комора најавија дека ќе преземат сите неопходни мерки за непречено и ефикасно спроведување на судењето за случајот „Пулс“, во кој загинаа 63 лица, а околу 200 беа повредени.

Првото рочиште е закажано за 19 ноември. Според обвинението, за тешки кривични дела против јавната безбедност се товарат 34 физички и 3 правни лица. Судењето ќе го води тим од околу 15 обвинители, соопшти државниот обвинител Љупчо Коцевски.

Фото: Б. Грданоски