Кинеските контејнери се повеќе се „трупаат“ во Русија

Контејнерите за испорака од Кина „се трупаат“ во Русија во услови на наплив на кинески стоки што се влеваат во земјата со зголемената трговија, покажа нова анализа.

Русија има дополнителни 150.000 транспортни контејнери кои увозниците се обидуваат да ги вратат во Кина, се вели во извештајот на логистичката платформа Container xChange, објавен во четвртокот, цитирајќи информации дадени од клиент.

„Постои значително движење на товар од Кина во Русија, но многу малку движење назад кон Кина од Русија. Контејнерите се трупаат во Русија, што значи дека цените на половните контејнери се многу ниски во Русија“, рече извршниот директор Кристијан Рулофс во извештајот.

Кина се појави како клучен економски спас за Русија по нејзината инвазија на Украина, бидејќи САД и нивните сојузници ја прекинаа трговијата и воведоа санкции за да ги задушат воените напори на Кремљ. Кина инсистираше на тоа дека е неутрална и сака само мир во Украина.

Но, кинеските лидери ја гледаат Москва како близок стратешки партнер и клучна противтежа против непријателскиот Запад. Пекинг остро ги критикуваше западните санкции кон својот северен сосед, истовремено зголемувајќи ги руските набавки на енергија и стана критичен снабдувач на стоки за широка потрошувачка за рускиот пазар.

Презаситеноста од контејнери, поради која цената на контејнерите од 40 стапки падна седум пати од почетокот на минатата година, е последица на „продлабочувањето на трговскиот дисбаланс меѓу Русија и Кина“ кога станува збор за видот на производи испратени со контејнери, според во Container xChange.

Во првите осум месеци од 2023 година билатералната трговија порасна за 32 отсто во споредба со истиот период претходната година, при што вкупниот обем на трговија достигна 155 милијарди долари, според податоците на кинеската царина објавени претходно овој месец.

Тоа вклучуваше пораст на извозот од Кина во Русија, кој скокна за 63,2 отсто од пред една година и достигна 71,8 милијарди долари. Увозот во Кина се зголеми за поскромни 13,3 отсто до 83,3 милијарди долари.

Русија соопшти дека очекува трговијата со Кина да достигне рекордни 200 милијарди долари оваа година – една година пред распоредот што претседателот Владимир Путин и кинескиот лидер Си Џинпинг го поставија во 2019 година.

Нивните растечки трговски врски ја префрлија руската енергетска трговија кон исток и предизвикаа критики дека економската поддршка на Кина ја поддржува руската војна против Украина.

Видот на разменетите стоки придонесува за вишокот на контејнери за испорака во Русија, според Container xChange.

Нејзиниот извештај укажа на купувањето на руски суровини од Кина, кои првенствено се транспортираат преку железнички цистерни и отворени вагони наместо во контејнери.

Автомобилите и потрошувачката електроника се меѓу клучните производи што кинеските добавувачи и ги продаваат на Русија, откако стотици светски брендови ја напуштија земјата по инвазијата.

Во друга насока, речиси една петтина од увозот на сурова нафта на Кина во јули дојде од Русија, објави Организацијата на земјите извознички на нафта во извештајот објавен претходно овој месец.

Заедно со Индија, Кина учествуваше со 80% од рускиот извоз на нафта во јули, се вели во извештајот на Меѓународната агенција за енергетика.

Container xChange, исто така, укажа на пошироки логистички проблеми поврзани со менувањето на трговските обрасци и метежот.

„Преоптоварените руски пристаништа и патишта предизвикуваат неефикасност во транспортот. Иако некои инвестиции се направени за подобрување на инфраструктурата, фискалните ограничувања и … [методите кои се користат за покривање] буџетски недостатоци ги комплицираат работите“, се вели во извештајот.

„Рускиот сврт кон Азија зависи од значителен развој на инфраструктурата“, се додава. (Си-Ен-Ен)