Како во кошница врие во Европа: ЕУ се меша во станбените прашања?

Итно треба да се справиме со станбената криза со која се соочуваат милиони семејства и млади луѓе, изјави шефицата на Европската комисија, Урсула фон дер Лајен.

Таа во неодамнешниот говор најави дека за прв пат Европската унија ќе добие комесар, односно министерство кое директно ќе се занимава со станбените прашања.

Европската унија главно се финансира со плаќања од богатите земји-членки, но по пандемијата почна да се задолжува самостојно и преку издавање заеднички обврзници, кои еден ден ќе треба заедно да се отплаќаат, пишува Пословни дневник.

Претседателот на Комисијата го оправдува воведувањето на нов комесар за домување со фактот дека Европа се соочува со станбена криза, а погодени се луѓе од сите возрасти и семејства од сите големини.

„Ќе развиеме европски план за достапно домување за да ги земеме предвид сите двигатели на кризата и да помогнеме во отклучувањето на неопходните приватни и јавни инвестиции“, рече германскиот политичар.

Во својот говор, фон дер Лајен призна дека домувањето не е препознаено како „типичен“ проблем на Брисел. Договорите на ЕУ не ја споменуваат оваа тема, а земјите-членки не ѝ дадоа овластување на Комисијата директно да интервенира во секторот на недвижности.

„Цените и кириите растат. Луѓето се борат да добијат прифатливи домови. Сакам оваа Комисија да ги поддржува луѓето онаму каде што е најважно, и ако е важно за Европејците, важно е и за Европа“, рече Фон дер Лајен и предложи преглед на правила за државна поддршка за да може да се доделат на поширок круг од населението, а не само на најсиромашните.

Исто така, се очекува Европската инвестициска банка да лансира паневропска инвестициска платформа за изградба на станови.

Во истражувањето на Евробарометар пролетта 2024 година, домувањето беше наведено како национален проблем број еден во три земји-членки (Ирска, Луксембург и Холандија). Има голем број земји каде што цената на становите е двојно зголемена во последните десет години, а Хрватска е една од нив. Шпанија во последно време „врие“ бидејќи туристичкото изнајмување го избрка локалното население од становите и го турна во населби со контејнери.