Јакимовски: Албанските општини имаат пари за академија, ние немаме ни за парно!

Првиот човек на општина Карпош, Стевче Јакимовски продолжи да изнесува информации по препукувањето меѓу него и МОН во однос на парното греење во осумте училишта во Карпош. Вели дека во 2022 година предвидени биле средства во износ од 39 милиони денари, а исплатени се само 20 милиони. За 2023 година добиле пет милиони денари повеќе.

-Претходната година ни скратиле 19, а оваа ни додале 5. Не може да се штеди на грбот на децата и граѓаните на општина Карпош. Вчера ги слушнавте градоначалниците Албанци кои рекоа дека сами ќе ја финансираат албанската академија. Тие имаат средства, а ние македонските градоначалници немаме средства ниту за парното во училиштата. Тоа го поддржа и претседателот на Град Скопје, Трајко Славески. Ова е договорена работа како да ги прејдат граѓаните, односно тоа да не го плати централната власт, туку да оди преку локалната самоуправа. Ова е срамно од една влада што дојде на власт на крајно антиалбанска реторика. Се однесува најнекоректно кон македонските општини  ставајќи ги на маргините, обвини Јакимовски во изјава за медиумите.