Холандската влада презеде кинески производител на чипови поради безбедносни причини. Пекинг бесен 

Холандската влада објави дека го презема производителот на чипови „Нексперија“ (Nexperia), наведувајќи ја желбата да спречи трансфер на технологија на кинескиот сопственик „Вингтех“ (Wingtech).

Владата „исклучително“ одлучи да интервенира, реагирајќи на „акутни сигнали за сериозни административни недостатоци и мерки“ во „Нексперија“, соопшти Министерството за економија во соопштение објавено во недела навечер.

„Овие сигнали го загрозуваат континуитетот и заштитата на клучните технолошки знаења и способности на холандско и европско тло“, се вели во соопштението на министерството, истакнувајќи дека нивното губење може да претставува ризик за холандската и европската економска безбедност.

За да ја преземе контролата врз компанијата, министерството се повика на закон на 30 септември кој гарантира достапност на стоки во итни ситуации.

„Нексперија“ продолжува да произведува, а со преземањето на контролата, владата може да ги поништи или блокира одлуките што ги смета за штетни.

„Вингтех“, од друга страна, изјави дека има намера да ги заштити своите права и ќе побара поддршка од кинеската влада.

„Компанијата активно разговара за правни лекови и стратегии со меѓународни адвокатски фирми и ќе преземе сите потребни мерки за заштита на легитимните права и интереси на компанијата и акционерите“, се вели во соопштението на „Вингтех“.

Администрацијата е исто така во контакт со кинеските власти за да обезбеди потребна помош.

Во поднесеното барање до берзата, „Вингтех“ објави привремено ограничена контрола врз работењето на „Нексперија“ поради холандската одлука и судските пресуди.

Одлуката на судот во Амстердам од 6 октомври го суспендираше извршниот директор на „Нексперија“, Жанг Сјуеженг, а на негово место ќе биде назначено независно лице со „одлучувачки глас“ без врски со Кина, забележува „Вингтех“.

 „Нексперија“ ги почитува „сите постојни закони и прописи, контроли на извозот и санкции“, изјави портпаролот на компанијата, одбивајќи да коментира понатаму.

Холандската компанија е еден од водечките светски производители на едноставни компјутерски чипови, како што се диоди и транзистори, но исто така развива и понапредни технологии кои треба да ја подобрат ефикасноста на батериите.

Во 2018 година, „Вингтех“ ја купи „Нексперија“  од холандската компанија „Филипс“ за околу 3,63 милијарди долари.

Во декември 2023 година, „Вингтех“ беше додаден на американскиот список на компании што претставуваат потенцијална закана за националната безбедност. Менаџментот на „Нексперија“ во тоа време нагласи дека ќе се придржува до санкциите, забележувајќи дека тоа нема значително да влијае на нејзиното работење бидејќи не е поврзано со „Вингтех“.

Во септември, САД го проширија списокот на критериуми за вклучување на списокот со санкции, кој сега автоматски ги вклучува подружниците во сопственост на 50 проценти или повеќе од санкционираните компании.

Поврзаноста на тој потег со активностите на холандската влада не беше веднаш потврдена, забележува Ројтерс, а двете земји вообичаено тесно соработуваат во прашањата за контрола на извозот во секторот за чипови.

Потегот на холандската влада дополнително ќе ги влоши тензиите со Пекинг, кои веќе се затегнати поради ограничувањата за испораките на машините за производство на чипови на АМСЛ до кинески клиенти.