Грејс Џонс под ѕвездено небо – Скопје звучеше како светска метропола (галерија)

Скопје синоќа беше музички центар во регионот – повеќеилјадна публика од Македонија и од соседството ја имаа уникатната можност да ја видат и слушнат под ѕвездено небо светската музичка ѕвезда Грејс Џонс на стадионот на АРМ која и во седмата деценија изгледа и звучи спектакуларно. Вечерта се измешаа фудбалската и музичката еуфорија, и се чини главниот град не спиеше. 

На концертот, 76- годишната Грејс Џонс, која ги побива стереотипите за жените на нејзина возраст, со уникатниот и андрогин имиџ и со раскошниот и моќен контраалт,  ги изведе најголемите хитови од речиси петдецениска кариера: Musical mastermind, ‘Amazing Grace’, ‘Timeless’, ‘Art aristocrat’, ‘True diva’, ‘Goddess of Rhythm’, ‘Pop culture icon’, ‘Fashion Icon’, ‘Vamp Woman’, Super Model и Movie Star“… Пред настапот во Загреб, пред три вечери, каде ја почести публиката со нумери од албумот во подготовка, тоа го направи и во Скопје, рече оваа песна е само за вас. 

Грејс Џонс во Скопје дојде со целиот тим од 30 луѓе, во рамките на нејзината летна турнеја, како дел од фестивалот „ Скопје колинг“, во организација на „ Авалон продукција“, а публиката (не) беше изненадена што присуствува на концерт со толку висок квалитет – од свирење, светло и звук.  Џонс, исто така, беше расположена, уште на почетокот ги спомна вкусните школки со кои е послужена во бекстејџот, а рајдер листата до организаторот вклучуваше и вина и шампањ „Кристал“.

Грејс Џонс ја започна пејачката кариера во 70-тите години на минатиот век. Од првиот албум- „ Портфолио“ во 1977, до последниот „ „Ураган“, во 2008, објави вкупно 10 носачи на звук, а повеќе нејзини хитови со недели беа на престижните светски топ листи. Од американската тв мрежа VH1 е поместена меѓу 100 жени на рокенролот, а списанието Билборд ја рангира меѓу 40 најголеми имиња на светската клупска сцена.

Џонс во Скопје останува три дена, потоа со летната турнеја продолжува во Лондон. 

Нашиот фоторепортер Борис Грданоски ги забележа најинтересните моменти од концертот, беа дозволени за фотографирање само првите три песни. Погледнете ја галеријата. (Л.С.)