Грчки танго маратон во Скопје

Во ексклузивен настан посветен на понатамошно поттикнување на културните врски и соработката меѓу Грција и Северна Македонија, „Центар 213“, во соработка со Амбасадата на Грција во Северна Македонија, го организираше вториот танго маратон „Emotions” – Грчко издание, кој се одржа во хотелот Limak Skopje Luxury од 12 до 14 септември 2025 година.

150 учесници од 28 земји од три континенти се собраа во Скопје за да го искусат ова уникатно Грчко издание, со сетови на грчките диџеи: Олга Профили, Стаматис Катаропулос, Олга Кириаку, Бабис Папас и Христина Арабаѕи, сите особено познати по својата уметност, бидејќи многумина од нив настапувале во Буенос Аирес и на водечките танго фестивали низ Европа.

За време на свечената Гала вечер на 13 септември, организаторите на настанот, Владанка и Онур Мок, топло ја поздравија публиката, додека пак заменик-шефицата на мисијата во Амбасадата на Грција, г-ѓа Христина Василату, изјави:

„Би сакала да одвојам момент за да им оддадам почит на визионерите кои ја овозможија оваа прослава. На моите наставници, Онур и Владанка. Вашата страст, посветеност и неуморна работа претворија еден сон во реалност. Вие не само што организиравте маратон, туку и негувавте заедница, и за тоа, ние како Грчка амбасада, сме длабоко благодарни и среќни што го спонзорираме овој настан.

Тангото не е само танц. Тоа е дијалог на душите. Тоа е тишина која станува музика, и музика што станува движење. Тоа е прегратка во која времето забавува, каде што две души ја наоѓаат рамнотежата во суптилен разговор на доверба.

Тука, на Балканот, и особено меѓу Грција и Северна Македонија, тангото исплете мрежа на пријателства преку границите, потсетувајќи нè дека кога танцуваме, не прашуваме од каде доаѓа некој – туку само дали е подготвен да ја сподели прегратката.

Овој маратон не е само за чекори и мелодии. Тој е за градење мостови. Секоја танда е приказна, секоја прегратка е ветување, секое движење е потсетник дека убавината живее во поврзувањето.“