Град Скопје за градскиот превоз: Мицкоски креира кризи во јавните претпријатија
Од Град Скопје попладнево признаа дека нафта за јавното сообраќајно претпријатие нема, а за тоа виновен е премиерот Христијан Мицкоски којс, според нив креира кризи во јавните претпријатија. Но, сепак, ни збор нема во соопштението дали воопшто попладнево ќе има автобуси, дали граѓаните да чекаат или секој да се снајде како знае и умее.
Попладнево, вработени во ЈСП Скопје, преку некои медиуми обзнанија дека единствени што можат да возат се автобустие на гас, 25 на број, додека оние кои возат на нафта се спречени, бидејќи претпријатието му должи на набавувачот „Пуцко петрол“, па тој не дозволува да се танкаат автобусите со гориво. Истото се случи и во понеделникот наутро, кога поради доцнење на полнење гориво во автобусите, скопјани чекаа и по еден час автобус на почетните станици.
Во соопштението од Град Скопје се вели „Мицкоски во континуитет преку своите кадри креира кризи во јавните претпријатија во Скопје. Одлука за решение за недостигот на автобуси и замената на дотрајаните автобуси со нови еколошки за ЈСП, веќе 24 пат по ред не ја носат послушниците на Мицкоски во Советот на Град Скопје на чело со Трајко Славевски.
Нова криза со која го остава ЈСП без нафта, а скопјани без јавен превоз како смислено сценарио за урнисување на претпријатието. Кадарот на шефот на ВМРО ДПМНЕ во Бирото за јавни набавки Маре Богева, креира криза во ЈСП за гориво, со тоа што за прв пат од постоењето на претпријатието ја поништи редовната јавна набавка за гориво во ЈСП како смислено сценарио.
Во исто време и со истото смислено сценарио приватните превозници, кои скоро воопшто не сообраќаат поради револт за неразгледување на нивната иницијатива за зголемување на цената по која возат, денес менуваат изјава дека не им биле верификувани извештаи за возење, а кој ќе им ги верификува кога не возат.
За одлука за зголемување на цена на приватниците може да расправа и да донесе одлука единствено Советот на Град Скопје, предводен од Трајко Славевски од ВМРО ДПМНЕ и Мицковистите.
За потсетување од моментот кога Мицкоски отпочна да преговара со компанија за набавка на 100 електрични автобуси, кое како и ветувањето за вкупно 250 нови автобуси од програмата за Скопје, се дел од ветувањата на ВМРО-ДПМНЕ за скопјани, отпочна и голготата на претпријатието. Во исто време почнаа и шпекулации за урнисување на ЈСП поради можно сценарио за негова приватизација“.