Горан Антевски доби пофалница од Министерството за надворешни работи на Јапонија

На 28 август, Министерството за надворешни работи на Јапонија ги објави добитниците на пофалница од министерот за надворешни работи, за 2025 година.  Министерството за надворешни работи додели пофалници на индивидуалци и групи со извонредни достигнувања на меѓународно ниво за нивниот придонес кон унапредување на пријателството помеѓу Јапонија и други земји, се вели во соопштението од Јапонската амбасада.

Од Северна Македонија, Горан Антевски (претседател на македонското здружение АОТС Алумни – Здружение за меѓународна техничка соработка и одржливи партнерства) е награден со пофалница за неговиот придонес во унапредувањето на взаемното разбирање меѓу Јапонија и Северна Македонија.

Антевски учествува во обука на АОТС во 2010 г. и истата година е назначен и за претседател на македонското здружение АОТС Алумни. Оттогаш, Антевски со голема посветеност ги промовира обуките на АОТС во Северна Македонија, придонесувајќи кон препознавање на важноста на обуките и зголемување на бројот на учесници од водечките македонски компании. Тој зема активна улога во процесот на селекција на учесници и често ги придружува во Јапонија, овозможувајќи успешна имплементација на програмата. Тој, исто така ја зајакнува координацијата на здруженијата АОТС Алумни во соседните земји. Антевски е голем поддржувач на јапонските културни настани и дава значителен придонес кон зајакнувањето на пријателството и взаемното разбирање меѓу Јапонија и Северна Македонија, се вели во соопштението на Амбасадата на Јапонија.