Германските медиуми пишуваат дека Србија ја загубила контролата над корона вирусот

Поради изборите властите целосно ја отворија Србија, доцолија натпревари со многу публика и го организираа контроверзниот тениски турнир на Новак Ѓоковиќ

Според повеќето медиуми, сега Србија не ја контролира пандемијата, туку пандемијата ја контролира Србија. Сериозни сомневања за официјалната статистика за бројот на заразените и починатите

 

„Србија беше на вистинскиот пат. На почетокот на годината, додека Европа го следеше со загриженост развојот во Италија, Шпанија и Франција – во Србија беше мирно.

Се чинеше дека Србија ја има короната под контрола, колку што беше можно. Но сега се чини дека Србија повеќе не ја контролира пандемијата, туку дека пандемијата ја контролира Србија“, пишува „Франкфуртер алгемајне цајтунг“.

„Според општото мислење, тоа има врска со изборите на 21 јуни и одлуките на надлежните во седмиците што им претходеа. За време на предизборната кампања, социјалниот живот во Србија беше отворен до тој степен што не можеше да се види речиси никаде на друго место на континентот. Изненадувачки врв – или дното на развојот – беше одобрувањето да се одржат големи спортски настани со публиката.

Во меѓувреме, пристигнаа првите сметки за она што во другите земји може да се нарече оргии на отворање. Настаните од изминатите неколку дена покажуваат дека ситуацијата е сериозна. Сепак, од економски причини, владата се обидува да избегне целосно „затворање“ како во март и април.

„Во секој случај, забележително е дека, според извештаите на државните медиуми во Србија, сè изгледа дека е под контрола. Сепак, ваквите проценки се противречни на голем број видеа и извештаи на социјалните мрежи, кои покажуваат сосема друга слика: преполни болници каде што луѓето во ходниците чекаат за помош. Или толпата во Белград пред брзата помош, на која медицинската сестра вели дека нема тестови, па да се вратат после 15 јули“, наведува „Франкфуртер алгемајне цајтунг“.

„Југоисточна Европа за време на врвот на епидемијата во Европа помина релативно добро. Дали е тоа причината зошто пандемијата сега се враќа во полна сила“, прашува „Шпигел“ и додава дека во целиот регион бројот на новозаразени рапидно расте „во Србија во споредба со претходната недела за 125 проценти, во Босна и Херцеговина за 75 проценти и во Хрватска дури 232 проценти “.

Авторот наведува дека поради тоа Австрија вовела строги ограничувања за сите оние што се враќаат од Србија, БиХ и Северна Македонија пред неколку дена. Истото важи и за Германија, која и покрај препораките на Советот на ЕУ, ја задржа забраната за влез за оние што доаѓаат од Србија.

За членките на ЕУ, Хрватска и Словенија, важат други правила. „Шпигел“ изјави дека хрватските власти посочуваат дека сите нови случаи на инфекција се „увезени“ од соседството. „Постои интензивен прекуграничен сообраќај меѓу балканските соседи, но граѓаните на Хрватска, наводно, не се придржуваат кон правилата за хигиена“.

„На Балканот не може да се расправа за втор бран на пандемијата. Корона вирусот, едноставно, доаѓа со задоцнување. Владите, свесни за слабостите на нивните здравствени системи, воведоа строги ограничувања уште многу рано, со што го задржаа бројот на инфекции на многу ниско ниво долго време. И тогаш властите се предадоа на притисокот на економијата и граѓаните. Покрај тоа, во некои земји се одржуваа избори“, пишува „Шпигел“.

„Но, без оглед колку беа строги ограничувањата, особено во Србија, каде што беше во сила дури и полицискиот час, многу се неразбирливи ненадејните отстапки“, продолжува „Шпигел“, цитирајќи ги натпреварите во Белград со 20.000 навивачи или несреќниот турнир на Новак Ѓоковиќ. Весникот, исто така, споменува и сомневање за официјалните бројки поврзани со вирусот корона во Србија.

Јужногерманскиот весник „Хајлбронер штиме“, исто така, се сомнева во официјалната статистика во Србија: „Разликата помеѓу официјалниот и реалниот број е, кога станува збор за смртни случаи, барем за 600 случаи. Бројот на дневни инфекции пред изборите беше десет пати поголем од официјалниот, 300 наместо 30“, вели за „Хајлбронер штим“ новинартката која имала увид во податоците што не се за јавноста. „Не знаеме зошто постојат овие разлики. Знаеме само дека има проблем, затоа што ниту кризниот штаб, ниту здравствените власти не одговараат на нашите прашања. Податоците што ги објавивме се точни “, вели Марија Ристиќ за „Хајлбронер штим“.

Влијателниот швајцарски портал Nau.ch  ја тематизира влошената состојба во Југоисточна Европа и укажува на „увезени“ случаи на инфекција во Швајцарија кои се поврзани со луѓе кои живееле во Србија. Nau.ch  зборува и за фалсификување податоци во Србија. „Забележуваме посебна концентрација на инфекцијата кај оние што пристигнале од Србија“, вели Стефан Кустер од швајцарската федерална канцеларија за здравство. Српскиот амбасадор во Швајцарија, Горан Градиќ, ги негира овие обвинувања: „Ситуацијата во Србија е стабилна“.

Германскиот јавен сервис АРД, на страниците на својата дописничка канцеларија за Југоисточна Европа со седиште во Виена, донесува опсежно досие за состојбата во регионот: „Дали е ова втор бран на короната или на врвот на првиот бран? За дефинициите може да се дебатира, но факт е дека напнатата епидемиолошка состојба во Југоисточна Европа не се олесни. Напротив!“, се заклучува во едиторијалот за прегледот на состојбите во овој дел од Европа.

Причините за ваквиот развој на ситуацијата АРД ги наведува со примерот на БиХ: „Насекаде можете да видите зошто се шири инфекцијата: во кафулиња, ресторани, продавници и јавен превоз, многумина не носат заштитни маски и никој не ги следи правилата на дистанца“.

Што се однесува до Хрватска, АРД вели дека контролата на короната е жртвувана во последните неколку недели за политика и туризам. „Хрватска е една од земјите што реагираа брзо и ефикасно на пандемијата. Но, од пред една недела, Хрватска е меѓу петте земји на ЕУ (заедно со Шведска, Полска, Франција и Шпанија) со најголем број новозаразени на 100.000 жители“, пишува АРД и заклучува:„ Ова сигурно не е добра реклама за туристичка земја Хрватска и секако една од причина што туристите не доаѓаат“. (Дојче веле)