Германската автомобилска индустрија губи 48.700 работни места: Рекордни намалувања на работната сила, еве што доведе до тоа

Структурните промени, преминот кон електрични возила, глобалната конкуренција и забавувањето на пазарот дополнително го оптоварија еден од клучните столбови на германската економија.

Германската автомобилска индустрија изгуби повеќе од 48.700 работни места во текот на изминатата година, според статистичката служба Дестатис.

Овој пад претставува намалување од околу 6,3 проценти од вкупната работна сила во секторот. На крајот од третиот квартал од 2025 година, во автомобилската индустрија биле вработени 721.400 луѓе, што е најмалку од вториот квартал од 2011 година, објавува Дојче Веле.

И покрај сите флуктуации, овој сектор сè уште останува еден од столбовите на германската економија и е втор најголем индустриски работодавач, веднаш зад машинската индустрија, која вработува 934.200 работници.

Во исто време, вкупниот број на индустриски работни места во земјата се намали за 2,2 проценти, но падот во автомобилскиот сектор беше значително над тој просек.

Што доведе до овој пад?
Во последниве години, германската автомобилска индустрија поминува низ еден од најголемите периоди на трансформација во својата историја. Неколку фактори стојат зад губењето на работните места:

-Транзиција од мотори со внатрешно согорување на електрични автомобили;
– Производството на електрични возила бара помалку работници бидејќи електричните мотори се технички поедноставни и имаат многу помалку подвижни делови во споредба со бензинските и дизел моторите. Како резултат на тоа, компаниите намалуваат одредени постројки и го оптимизираат производството.

Пад на побарувачката и неизвесност на пазарот
По пандемијата, европскиот пазар на автомобили се опорави побавно од очекуваното. Инфлацијата, зголемувањето на цените на електричната енергија и суровините, како и намалувањето на субвенциите за електрични возила во некои земји, дополнително ја комплицираа ситуацијата.

Силна конкуренција од Кина
Кинеските производители на електрични автомобили нудат поевтини модели, што врши притисок врз европските компании, особено во пониските и средните ценовни сегменти.

Автоматизација и дигитализација на производството
Широката примена на роботиката и дигиталните технологии во фабриките ја намалува потребата од рачна работа, што директно влијае на бројот на вработени.

Геополитички фактори и прекини во синџирот на снабдување

Последиците од војната во Украина, нестабилното снабдување со енергија и проблемите во глобалните синџири на снабдување (микрочипови, батерии) дополнително го забавија растот на индустријата.