Германија сака за Европа со „две брзини“ со јадро од шест земји

Германија ќе се залага за Европска унија со две брзини за да се прекине моменталната инерција во донесувањето одлуки во блокот од 27 земји и да се постигне економско заживување. Според Берлин, ова треба да се направи со воспоставување јадро од шест земји-членки способни да дејствуваат по клучни политички прашања, со цел Европа да стане посилна и понезависна, објави Ројтерс.

„Сега е време за двобрзинска Европа“, изјави германскиот министер за финансии и вицеканцелар Ларс Клингбајл на настан во Берлин во вторникот, организиран од весникот „Велт“.

Министрите за финансии на Германија и Франција сакаат да ја зголемат конкурентноста на ЕУ со презентирање нов формат во кој ќе бидат вклучени шесте најголеми економии во Европската унија, според писмо напишано од германскиот министер и видено од Ројтерс.

Во него, Клингбајл ги поканува партнерите од Франција, Полска, Шпанија, Италија и Холандија на видео-конференција во среда за да постават амбициозна и конкретна агенда за зајакнување на суверенитетот, отпорноста и конкурентноста на Европа.

Европските економии се обидуваат да ја намалат својата зависност од увоз на критични суровини од земји како Кина и да дејствуваат врз основа на стравувањата дека трговските тарифи и фрагментацијата на глобалните пазари би можеле да го поткопаат растот и инвестициите.

„За да преживее во сè понепредвидлива геополитичка средина, Европа мора да стане посилна и поотпорна“, напиша Клингбајл во писмото до своите колеги, со датум од понеделникот, додавајќи дека работењето како и обично не е одржлива опција.

Во поканата се вели дека состанокот во среда има за цел да „постави сцена“, а потоа да биде проследен со уште еден, веќе постоечки, состанок на маргините на следниот состанок на Еврогрупата.

Што вели писмото?

Писмото, кое го виде Ројтерс, содржи план од четири точки за тоа како да се забрза унијата на пазарите на капитал, да се зајакне еврото, подобро да се координираат трошоците за одбрана и да се обезбедат суровини.

Клингбајл рече дека коалицијата на земји треба да ја забрза работата на Унијата за штедење и инвестиции (иницијатива за реформирање и интегрирање на пазарите на капитал во ЕУ) со цел да се создадат подобри услови за европските бизниси, а особено за стартапите и растечките компании.

Втората точка ја нагласува меѓународната улога на еврото како безбедно засолниште засновано на предвидливост и владеење на правото, рече Клингбајл, повикувајќи на намалување на бирократијата и зајакнување на суверенитетот во секторот за плаќања.

Во врска со трошоците за одбрана, Клингбајл повика на подобра соработка меѓу земјите-членки и одбраната да биде цврсто приоритизирана во следната повеќегодишна финансиска рамка на ЕУ, така што „одбраната ќе стане двигател на растот“. Обезбедувањето на снабдувањето со стратешки ретки земјини елементи, според германскиот министер, бара напори за зајакнување на отпорноста на синџирите на снабдување со критични суровини. За таа цел, рече тој, потребен е стратешки дијалог со меѓународните партнери.