Германија ја зголемува минималната плата од 1 јануари, компаниите најавуваат зголемување на цените и отпуштања

Од 1 јануари следната година, Германија ќе ја зголеми минималната часовна плата од 12,82 на 13,90 евра бруто, а многу компании најавуваат зголемување на цените и отпуштања за да ги покријат новите трошоци, според извештајот на Институтот за економски истражувања (Ifo).

Најизразени ефекти се очекуваат во угостителскиот и малопродажниот сектор, каде што ниските плати се најзастапени.

Истражувањето покажува дека како најчеста реакција, компаниите планираат да ги зголемат цените на своите производи и услуги, иако малку помалку отколку во 2022 година, кога минималната плата последен пат беше значително зголемена.

Наместо тоа, сè поголем број компании најавуваат намалување на бројот на вработени и одложување на инвестициите, што укажува на притисокот што го создава зголемувањето на минималната цена на трудот во период на економска стагнација.

Многу компании кои се директно погодени од зголемувањето на минималната часовна плата очекуваат слабеење на профитабилноста, како и зголемување на влезните трошоци, вклучувајќи ги набавките и логистиката. Покрај тоа, значително се зголемил уделот на компаниите кои се плашат дека зголемувањето на минималната плата дополнително ќе ја намали нивната конкурентност, што не беше толку вообичаена загриженост во времето на зголемувањето на минималната плата во 2022 година.

Ifo заклучува дека влијанието на зголемувањето на минималната плата врз компаниите зависи и од пошироката економска состојба во Германија.

Германската економија долго време се бори со тешкотии, па затоа негативните ефекти од зголемувањето на минималната плата би можеле да бидат поизразени отколку во претходните циклуси на зголемување на минималната плата, според веб-страницата на Ifo.